يراكتىڭ پرەمەر-مينيسترىنە شابۋىل جاسالدى

ۇكىمەت ءۇيىن درون ارقىلى اتقان

قاراشانىڭ 7 كۇنى باعدادتا درون ارقىلى يراك پرەمەر-مينيسترى مۇستافا ءال-قازىميدىڭ ومىرىنە شابۋىل جاسالدى، دەپ حابارلايدى Almaty-akshamy.kz.
ۇكىمەت باسشىسى Twitter-دە وقيعا جايلى جازىپ، ءوزىنىڭ زارداپ شەكپەگەنىن مالىمدەدى.

«مەندە ءبارى جاقسى، حالىقتى يراك ءۇشىن سابىرلىق پەن ۇستامدىلىققا شاقىرامىن. ساتقىنداردىڭ زىمىرانى حالىقتىڭ قاۋىپسىزدىگىن ساقتاپ جۇرگەن ءبىزدىڭ قاھارمان قاۋىپسىزدىك كۇشتەرىنىڭ تاباندىلىعىنا توتەپ بەرە المايدى»،-دەپ جازدى ول.

Al Hadath تەلەارناسىنىڭ مالىمەتىنشە، جارىلىس كەزىندە پرەمەر-مينيستردىڭ كۇزەت قىزمەتىنىڭ 10 قىزمەتكەرى زارداپ شەككەن. وعان قوسا، باعدادتىڭ جاسىل ايماعىندا ورنالاسقان ۇكىمەتتىڭ رەزيدەنسياسىنا ماتەريالدىق شىعىن كەلگەن. 

العاشىندا ۇكىمەت رەزيدەنسياسىنا شابۋىل جاسالعانىن Al Ara تەلەارانسى حابارلاعان. يراك اسكەريلەرى كەيىن بۇل اقپاراتتى راستادى. 

«ءال-قازىمي زارداپ شەككەن جوق، ول ءدىن امان. قاۋىپسىزدىك قىزمەتتەرى قاجەتتى شارانى جاساپ جاتىر»،-دەلىنگەن اسكۋەريلەر تاراتقان مالىمەتتە. ونىڭ الدىندا Al Arabiya تەلەارناسى پرەمەر جەڭىل جاراقات الىپ، اۋرۋحاناعا تۇسكەنىن حابارلاعان ەدى.

يراك باق-نىڭ مالىمەتىنشە، ۇكىمەت باسشىسى ءقازىر ءقاۋىپسىز جەردە. سونداي-اق ءقازىر جاسىل ايماققا ءوتۋ ورىندارىندا قاۋىپسىزدىك شارالارى كۇشەيتىلگەن.