باعدارلاما 10 قىركۇيەكتە ەفيرگە شىعادى
الماتىنىڭ ءبىلىمدى وقۋشىلارى ب ا ق سىنايتىن «IQ الماتى» ينتەلەكتۋالدى شوۋى كورەرمەنگە قايتا جول تارتادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
باعدارلامانىڭ ماقساتى – مەكتەپ تۇلەكتەرىنە جاڭا ءومىر بەلەسىنە قادام جاساۋعا مۇمكىندىك بەرۋ. جوباعا الماتى قالاسىنداعى 11-سىنىپ مەكتەپ وقۋشىلارى ىرىكتەلىنىپ الىنادى. ءار كەزەڭدە ۇزىكتەردى انىقتاپ وتىراتىن جوبا 5 كەزەڭنەن تۇرادى.
«بۇل جوبا زامانعا ساي قاجەتتى ءارى پايدالى جوبا. ادەتتەگى ويىن-ساۋىق جوبالارىنا ۇقسامايدى. ۇرپاقتى دامىتۋعا قوساتىن ۇلەسى كوپ. جاستار ول – ۇلتتىڭ اۆانگاردى دەسەك بولادى. 2020 جىلدان بەرى بىلىمگە كوپ كوڭىل ءبولىنىپ جاتىر. الەم بويىنشا ءبىلىمدى ادامداردىڭ تاسى ورگە دومالاپ جاتىر. سول سياقتى قازاق ەلىندە دە ءبىلىم سالاسىن دامىتۋ، جاڭالىق اشۋعا تالپىنىپ جاتقانىمىز ءسوزسىز. وسى تۇرعىدان العاندا «IQ الماتى» باعدارلاماسى جاستارعا ۇلكەن ومىرگە قادام جاساۋعا مۇمكىندىك بەرەدى»، – دەدى شەف-رەداكتور بايان باقكەلدى.
ال 16 جاسىندا وسىنداي باعدارلاماعا قاتىسقان جوبا جۇرگىزۋشىسىنىڭ ايتۋىنشا، ينتەلەكتۋالدى سايىس ۇرپاق تاربيەسىنە، ءبىلىم ساپاسىنىڭ ارتۋىنا زور ىقپال ەتەدى.
«2009 جىلى قاتىسقام. 16 جاستا ەدىم. جوبا كەرەك. ەلىمىزدى دامىتۋعا، جاستاردى دۇرىس جولعا سالۋعا، باعىت بەرۋدە ءوز رەيتينگىسىن كورسەتەدى. جۇزدەن جۇيرىك، مىڭنان تۇلپار – ءبىلىمدى جاستار قاتىسادى. وسىنداي زياتكەرلىك باعدارلامانىڭ كوبەيگەنى قۋانتادى. ال ونى جۇرگىزۋ مەن ءۇشىن جاۋاپكەرشىلىك ءارى مارتەبە»، – دەدى باعدارلاما جۇرگىزۋشىسى داۋلەت مۇقايەۆ.
بەس كەزەڭنەن ىرىكتەلىپ الىنعان 2 وقۋشى جوو-دا وقۋعا مۇمكىندىك الادى. جوبانىڭ تيىمدىلىگى سول – جوو ءبىلىمدى ستۋدەنتتى قابىلداسا، تۇلەكتەر تەگىن وقۋ ارقىلى جارقىن بولاشاعىنا جولداما الادى. سونداي-اق باعدارلاما بارىسىندا قالا مەكتەپتەرىنىڭ دەڭگەيىن دە انىقتاۋعا بولادى. ال مەكتەپ باعدارلاماسىنداعى سۇراقتاردى قويۋ ارقىلى كورەرمەندى دە قىزىقتىرادى. باستاۋىش نە ورتا بۋىن وقۋشىلارىن ساباقتى جاقسى وقۋعا ىنتالاندىرادى.