استانالىق تۇرعىننان 33 ملن تەڭگەگە جۋىق قارجىنى قورقىتىپ العان كۇدىكتىلەر قۇرىقتالدى
31 جانە 46 جاستاعى ەكى ەر ادام بىرنەشە جىل بويى استانالىقتان اقشانى قورقىتىپ العان. ولار پسيحولوگيالىق قىسىم كورسەتۋ ارقىلى، ينتيمدىك سيپاتتاعى فوتوسۋرەتتەر مەن بەينەجازبالاردى تاراتامىز دەپ قورقىتىپ، 2019 جىلدان باستاپ ەر ادامدى بوپسالاعان.
بىرنەشە جىل ىشىندە استانالىق ازامات بوپسالاۋشىلارعا جالپى سوماسى 33 ملن تەڭگەگە جۋىق اقشا بەرگەن.
كۇدىكتىلەردىڭ ءبىرىنىڭ تالابىن ورىنداۋ ءۇشىن جابىرلەنۋشى ءوزىنىڭ Toyota Land Cruiser Prado اۆتوكولىگىن لومباردقا تاپسىرىپ، 10 ملن تەڭگە بەرگەن. 46 جاستاعى كۇدىكتىنىڭ كەزەكتى بوپسالاۋ فاكتىسىنەن كەيىن ەر ادام وسى جىلدىڭ قاراشا ايىندا پوليسياعا جۇگىنگەن.
جەدەل-ىزدەستىرۋ ءىس-شارالارى بارىسىندا ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى بوپسالاۋعا قاتىسى بار ەكى ەر ادامدى ۇستادى جانە قاماۋعا الدى.
كۇدىكتىلەردىڭ ءبىرى الماتى قالاسىندا ۇستالدى. جەكە تەكسەرۋ بارىسىندا ودان ەسىرتكى زاتى ورالعان تۇيىنشەك تاركىلەندى. ۇستالعان ادامنىڭ بۇرىن وسىعان ۇقساس قىلمىس جاساعانى ءۇشىن سوتتالعانى انىقتالدى.
قازىرگى ۋاقىتتا اتالعان فاكتى بويىنشا ق ر قك-نىڭ 194-بابى (قورقىتىپ الۋ) بويىنشا سوتقا دەيىنگى تەرگەۋ امالدارى جۇرگىزىلىپ جاتىر.
استانا قالاسىنىڭ پوليسيا دەپارتامەنتى زاڭناماعا سايكەس ءىرى جانە اسا ءىرى مولشەردە مۇلىك الۋ ماقساتىندا جاسالعان قورقىتىپ الۋ 5 جىلدان 15 جىلعا دەيىنگى مەرزىمگە باس بوستاندىعىنان ايىرۋعا جازالاناتىنىن ەسكەرتەدى.