ينتەرنەتكە تاۋەلدىلىكتەن قالاي ارىلامىز؟
سوڭعى ۋاقىتتا جۇلىنىمىز عالامتورعا بايلانىپ قالعانداي كورىنەدى. بارلىعىن وسى ارقىلى شەشەمىز. ونسىز حات-حابار، بايلانىس جوق سياقتى. ءتىپتى ءبىر ۇستەلدىڭ باسىندا وتىرعان جاندار تىلدەسۋدەن قالىپ بارادى. كەيدە بىر-بىرىنە حابارلاما جىبەرۋ ناتيجەسىندە يشارا بىلدىرەدى. مۇنىڭ سوڭى تىلسىزدىككە الىپ كەلمەي مە؟! ۆيرتۋالدى پىكىر الماسقان ءجون-اق. دەگەنمەن، قارىم-قاتىناس جاساپ، سويلەسىپ، ادامنىڭ ميميكاسىن اڭعارعاننان ارتىق عانيبەت بار ما؟.
اسىرەسە، جاس بۋىن وسىعان اۋەس. قاتتىراق ايتقاندا، باس المايدى. كۇندىز ۇيىقتاپ، تۇسىندە الەۋمەتتىك جەلىدە وتىرادى. عالامتورعا بايلانعان. باسقاعا نازار اۋدارا قويمايدى. ءوسىپ جەتىلىپ، جاس شىبىقتاي شيراتىلىپ كەلە جاتقان ساتتە قوزعالىس از بولۋدا. ويناۋ، سەكىرۋ، جۇگىرۋ جاعى كەندە قالعان. بۇل قالا مەن دالادا بىردەي ورىن الىپ جاتقان جاعداي. بۇنداي جاعداياتتار ەشكىمگە تاڭسىق بولماي تۇر.
پايداسى مەن زيانى. نارشا بۋلگاكبايەۆ «ينتەرنەت پەن الەۋمەتتىك جەلىنى قولدانۋ كەزىندە ءسىزدىڭ نازارىڭىزدى اۋدارۋ ءۇشىن ولار سىزگە اۋديو-ۆيزۋالدى ميعا شابۋىل جاسايدى» دەيدى. بۇعان اسا باس قاتىرۋدىڭ قاجەتى جوق. نەگىزى 2-3 ساعات عالامتوردى قولدانساڭىز، ءبىراز شارۋانى تىندىراسىز. ودان ارتىعى جۇيكەگە اۋىر. ابدەن شارشاتادى، قالجىراتادى. ال بىزدەر وسى نورمانى ۇستاپ ءجۇرمىز بە؟ ارينە، ولاي دەي المايمىز. كەڭسەلىك قىزمەتكەرلەر وسىنىڭ الدىن الۋ ءۇشىن ءتۇرلى جاتتىعۋ جاسايدى. سونىمەن قاتار، كاكتۋس ت.ب بولمە گۇلدەرىن وسىرەدى. بۇلار زياندى ەنەرگيانى وزىنە تارتادى ەكەن.
سول سەبەپتى دە باسقالارىمىز قولدان كەلگەنشە اتالعان ماسەلەلەرگە نازار اۋدارعانىمىز ابزال. ايتىلعاندار كادەگە جارايتىن قاراپايىم نارسەلەر بولىپ تابىلادى.
عالامدى شىرماعان عالامتور. جۋرناليستەر اراسىندا «كىم اقپاراتتى جەتىك يگەرەدى، سول عالامدى باسقارادى» دەپ جاتادى. وسى ءسوزدىڭ بۇگىندە اۋقىمى كەڭەيگەن. بالكىم زاماننىڭ ىعى دا سولاي بولىپ تۇرعان شىعار. دەيتۇرعانمەن قازىرگى اقپاراتتىڭ كوپتىگى سونداي، قورىتىپ ۇلگەرمەيمىز. ميدى تولتىرىپ تاستاعان. ويتكەنى قاجەتسىز، كەرەكسىز دۇنيەلەر كوپ. باستىسى ميدى جىلدام شارشاتادى. اقىر سوڭىندا اگرەسسياعا دۋشار ەتەدى. سونداي ساتتە ويعا كەلگەن قورىتىلىپ ۇلگەرمەگەن ويدى جاريالاپ جىبەرۋگە اكەپ سوعادى. ونىڭ ارتىندا قانشاما ادام تۇر. ال اركىمدەرگە نەشە ءتۇرلى باعىتتا اسەر ەتۋى مۇمكىن.
قورىتىندى. داڭقتى باتىر باۋىرجان مومىش ۇلى اتامىز «كوپ تۇرعان سۋ ساسيدى، ويلاماعان مي ساسيدى» دەپ وي قالدىرىپتى. سونداي ءوز جايىمەن تاۋىپ ايتىلعان ناقىل ءسوز. ءبارىن پايىمداپ ساراپتاعاندا وسىعان سايادى. ايتارىمىز - ءار نارسەدە بالانستىڭ بولعانى ابزال.