ەلەكتروندىق كوممەرسيانىڭ دامۋىمەن قاتار ينتەرنەت-الاياقتىق قارقىن الۋدا. وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنىڭ وكىلدەرى ينتەرنەت-الاياقتىقتان ساقتانۋ جولدارىن ايتتى، دەپ حابارلايدى Almaty-akshamy.kz.
دەپارتامەنتتە كيبەرقىلمىسكەرلەردىڭ قۇربانى بولعان تۇرعىنداردىڭ شاعىمدارى جىلدان جىلعا ارتىپ كەلە جاتقانىن اتاپ ءوتتى. جىل باسىنان بەرى دەپارتامەنتكە ازاماتتاردان 3500-دەن استام ءوتىنىش كەلىپ ءتۇستى، كاسىپكەرلەرگە قاتىستى جوسپاردان تىس تەكسەرۋلەر جۇرگىزىلدى جانە سايكەسىنشە 120 اكىمشىلىك حاتتاما جاسالدى، سونداي-اق تۇتىنۋشىلارعا 90 ملن تەڭگەدەن استام قاراجات قايتارىلدى.
"بۇگىنگى تاڭدا تۇتىنۋشىلاردىڭ قۇقىقتارىن قورعاۋ سالاسىندا كوپتەگەن شاعىمدار كەلىپ تۇسۋدە. كوبىنەسە تۇتىنۋشىلاردىڭ قۇقىقتارى ەلەكتروندىق ساۋدا سالاسىندا بۇزىلادى. بۇل رەتتە جوسىقسىز كاسىپكەرلەر تاراپىنان الاياقتىق فاكتىلەرى بار. سونىمەن قاتار، ازاماتتار "تۇتىنۋشىلاردىڭ قۇقىقتارىن قورعاۋ تۋرالى" قازاقستان رەسپۋبليكاسى زاڭىنىڭ نورمالارىمەن جەتكىلىكتى تۇردە تانىس ەمەس، بۇل ولاردىڭ كاسىپكەرلەر تاراپىنان زاڭدى قۇقىقتارى مەن مۇددەلەرىن بۇزىلۋىنا الىپ كەلەدى"، - دەدى الماتى قالاسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى باسشىسىنىڭ ورىنباسارى نۇرلىبەك بيمۋرزايەۆ.
ازاماتتاردى قورعاۋ ماقساتىندا ساۋدا جانە ينتەگراسيا مينيسترلىگى مەن اۋماقتىق ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتتەرى ءوز كەزەگىندە تۇراقتى نەگىزدە كونسۋلتاتيۆتىك-اعارتۋ جۇمىستارىن جۇرگىزەتىنىن ايتىپ ءوتتى.
سونداي-اق، الماتى قالاسىنىڭ دەپارتامەنتى قوعامدىق بىرلەستىكتەردىڭ قاتىسۋىمەن اشىق ەسىك كۇندەرىن، ءوز قۇقىقتارى مەن زاڭدى مۇددەلەرىن قورعاۋ ماسەلەلەرىندە تۇتىنۋشىنىڭ قۇقىقتىق ساۋاتتىلىعىن ارتتىرۋ ءۇشىن ازاماتتاردى قابىلداۋدى تۇراقتى نەگىزدە وتكىزەدى.
"كاسىپكەرلەر ءۇشىن ەلەكتروندىق ساۋدانىڭ الەۋەتى زور، ويتكەنى ءبىز قارقىندى دامىپ كەلە جاتقان تەحنولوگيالار كەزىندە ءومىر ءسۇرىپ كەلەمىز جانە قولما-قول اقشاسىز ەسەپ ايىرىسۋدى پايدالاناتىن تۇتىنۋشىلار سانى كۇن سايىن ارتىپ كەلەدى. ارتىقشىلىقتارى رەتىندە: شاعىن جانە ورتا بيزنەستى دامىتۋ، جاڭا يننوۆاسيالىق جوبالاردى اشۋ، سونداي-اق بۇرىننان بار كومپانيالاردى جاڭعىرتۋ، كولەڭكەلى اينالىمدى قىسقارتۋ، حالىق پەن كاسىپكەرلىكتىڭ قۇقىقتىق جانە سيفرلىق ساۋاتتىلىعىن جاقسارتۋدى اتاپ وتكەن دۇرىس"، - دەدى ن. بيمۋرزايەۆ.
دەگەنمەندە، تۇتىنۋشىلار جوسىقسىز كاسىپكەرلەرگە دە تاپ بولىپ جاتادى: پوشتا ارقىلى تۇتىنۋشى تاپسىرىس بەرگەن ءونىم مۇلدەم كەلمەيدى، نەمەسە ساپاسى جارنامادا، ينتەرنەت-سايتتا كورسەتىلگەن ونىمگە سايكەس كەلمەيدى.
الاياقتىقتىڭ ەڭ كوپ تارالعان ءتۇرى - بۇل سايتتار مەن الەۋمەتتىك جەلىلەردەگى جارنامالار. اۆتوكولىك اكسەسسۋارلارىن، سمارتفوندار جانە باسقا جابدىقتاردى، كيىم مەن اياق كيىمدى، تاپسىرىس بويىنشا جيھازدى ساتىپ الۋشىلار ينتەرنەت-الاياقتارعا ءجيى كەزدەسەدى. سونىمەن قاتار، الەۋمەتتىك جەلى نە ينتەرنەت-دۇكەن بولسىن، الاياقتارعا تاپ بولۋ مۇمكىندىگى بىردەي، دەپ اتاپ ءوتتى سپيكەر.
"الاياقتار ءوز قۇرباندارىن قالاي تارتادى؟ ەڭ الدىمەن - نەگىزسىز تومەن باعامەن. تاۋارلارعا تاپسىرىس بەرۋ كەزىندە كوبىنەسە جەدەل تولەم تەرمينالى ارقىلى بەلگىلى ءبىر ۆيرتۋالدى ءاميانعا اقشا سالۋ ارقىلى الدىن-الا تولەم جاساۋدى سۇرايدى. ءارى قاراي، دۇكەن بىرنەشە كۇن بويى سىلتاۋلار ايتىپ، سىزگە تاۋاردى جەدەل جەتكىزۋگە ۋادە بەرەدى، سودان كەيىن ءىز-تۇزسىز جوعالادى نەمەسە ساپاسىز تاۋار جىبەرەدى. الدىن-الا تولەنگەن ءونىمدى ساتىپ الار كەزدە، ەستە ۇستاۋ قاجەت نارسە ول سەنىمدى ينتەرنەت-دۇكەندەر سىزدەن ۆيرتۋالدى ءاميانعا نەمەسە ۇيالى تەلەفون شوتىنا اقشا اۋدارۋدى سۇرامايدى. ينتەرنەت جەلىسىنەن دۇكەن تۋرالى اقپاراتتى ىزدەڭىز، ونىڭ نارىقتا قانشا ۋاقىت بولعانىن تەكسەرىڭىز. ەگەر ءسىز ءىرى دۇكەندەر جەلىسى نە ءوزىڭىز بىلەتىن كومپانيانىڭ سايتى ارقىلى تاپسىرىس بەرمەك بولساڭىز، براۋزەردىڭ مەكەنجاي جولاعىندا رەسۋرستىڭ مەكەنجايىن دۇرىس جازعانىڭىزعا كوز جەتكىزىڭىز"، - دەپ كەڭەس بەردى ن. بيمۋرزايەۆ.
سونداي-اق، تاۋار ساتىپ الماس بۇرىن، دۇكەن اكىمشىلىگىنەن زاڭدى تۇلعا تۋرالى دەرەكتەردى سۇراتىپ، الىنعان اقپاراتتى سالىق ورگاندارىنىڭ جالپىعا قولجەتىمدى دەرەكقورلارى مەن زاڭدى تۇلعالاردىڭ ءتىزىمىن پايدالانىپ تەكسەرۋ قاجەت.
"ونلاين ساۋدا جاساماس بۇرىن، باسقا ساتىپ الۋشىلاردىڭ پىكىرلەرىمەن تانىس بولىڭىز. دەگەنمەن، كەي قىلمىسكەرلەر قوسىمشا ەسەپتىك جازبالاردى قولدانا وتىرىپ، وزدەرى تۋرالى وڭ پىكىرلەر قالدىرا الاتىندىعىن ۇمىتپاعان ءجون. ينتەرنەت جەلىسىن پايدالانىپ ىزدەڭىز. ىزدەۋ فورماسىنا ساتۋشىنىڭ تەلەفون ءنومىرىن نەمەسە جەلىلىك بۇركەنشىك اتىن ەنگىزۋ ارقىلى، بۇل دەرەكتەردىڭ قولما-قول اقشانى ۇرلاۋ جانە ساتىپ الۋشىلاردى الداۋ ماقساتىندا پايدالانىلعانىن انىقتاۋعا دا بولادى"، - دەپ اتاپ ءوتتى سپيكەر.
سونىمەن قاتار، ساتىپ الۋشىلار ءاردايىم تاۋاردىڭ قۇنىنا نازار اۋدارۋى كەرەك، ەگەر باعا نارىقتىق باعادان ەداۋىر تومەن بولسا، وندا بۇل كۇدىك تۋدىرۋى كەرەك.
"زاڭنىڭ 24-بابىنا سايكەس ساتۋشىنىڭ قازاقستان رەسپۋبليكاسىنىڭ سالىق زاڭناماسىندا كوزدەلگەن تارتىپپەن باقىلاۋ-كاسسا ماشينالارىنىڭ بولۋى، سونداي-اق باقىلاۋ-كاسسا ماشينالارىنىڭ ورنالاسقان جەرىندە قازاق جانە ورىس تىلدەرىندە اقپارات ورنالاستىرۋعا مىندەتتى. فيسكالدىق چەك ۇسىنىلماعان جاعدايدا تۇتىنۋشى مەملەكەتتىك كىرىستەر ورگاندارىنا جۇگىنۋگە قۇقىلى. ايتا كەتۋ كەرەك، تۇتىنۋشى تاۋاردى ءوز ەركىمەن تاڭدايدى جانە ساتىپ الۋدى جۇزەگە اسىرادى، سوندىقتان ساتۋشىنىڭ دەرەكتەمەلەرى مەن بايلانىس دەرەكتەرىن انىقتاۋ جاۋاپكەرشىلىگى تۇتىنۋشىنىڭ وزىنە جۇكتەلەدى. تۇتىنۋشىلاردىڭ قۇقىقتارىن قورعاۋ سالاسىنداعى ۋاكىلەتتى ورگان ەلەكتروندىق ساۋداعا جوسىقسىز قاتىسۋشىلارىن ىزدەستىرۋ ءىس-شارالارىن جۇرگىزبەيدى. الاياقتىق جانە تۇتىنۋشىلاردى الداۋ فاكتىلەرى بويىنشا ينتەرنەت-الاياقتارىن ىزدەستىرۋ ءىس-شارالارىن ىشكى ىستەر ورگاندارى قارايدى"، - دەپ ەسكە سالدى.
الماتى قالاسى ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنىڭ قىزمەتكەرلەرى "جەدەل جەلى" ارقىلى جانە ازاماتتاردى جەكە قابىلداۋ كەزىندە تۇتىنۋشىلارعا ساتۋشىعا قاتىستى ءارى قاراي ارەكەت ەتۋ، ولاردىڭ زاڭدى مۇددەلەرى مەن بۇزىلعان قۇقىقتارىن قورعاۋ جولدارى تۋرالى كەڭەس بەرەدى.
مەملەكەتتىك ورگانعا ءوتىنىشتى e-Otinish ءبىرىڭعاي اقپاراتتىق پلاتفورماسى، Egov.kz ەلەكتروندىق ۇكىمەت پورتالى ارقىلى جىبەرۋگە بولادى، نەمەسە 8 (727) 392-21-83 جەدەل جەلىسى بويىنشا قوڭىراۋ شالۋعا، سونداي-اق تۇتىنۋشىلار الماتى قالاسى تۇتىنۋشىلاردىڭ قۇقىقتارىن قورعاۋ جونىندەگى قوعامدىق بىرلەستىكتەرگە كومەك پەن كەڭەس الۋعا قۇقىلى.
الماتى قالاسى بويىنشا تۇتىنۋشىلاردىڭ قۇقىقتارىن قورعاۋ جونىندەگى قوعامدىق بىرلەستىكتەردىڭ ءتىزىمى:
- «ادال» تۇتىنۋشىلاردىڭ قۇقىقتارىن قورعاۋ جونىندەگى قوعامدىق بىرلەستىك، تەل. 292 28 67، +7 708 682 73 05، بايتۇرسىنوۆ ك.،. عابدۋللين ق.، 145/26
- «جۇمىس بەرۋشىلەردىڭ قۇقىقتارىن قورعاۋدىڭ ەرىكتى قوعامى» قوعامدىق بىرلەستىگى، تەل. 239 34 76، +7 708 971 29 76، سپاسسكايا ك.، 63ا، 15 پ.
- «فەميدا» تۇتىنۋشىلاردىڭ قۇقىقتارىن قورعاۋ جونىندەگى قالالىق ورتالىق» قوعامدىق ۇيىمى، تەل. 397 52 31، +7 702 958 49 96، +7 707 308 74 74، ماقاتايەۆ ك. 45، 114 كەڭسە
- «ۇلتتىق تۇتىنۋشىلار ليگاسى» رەسپۋبليكالىق قوعامدىق بىرلەستىگى، تەل. 277 89 45، شيەۆچەنكو ك.، 164 گ، 1 كەڭسە
- «اتا-بابا داستۇرلەرىنىڭ مۇراسى» تۇتىنۋشىلاردىڭ قۇقىقتارىن قورعاۋ» قوعامدىق قورى، +7 707 046 38 82، پۋشكين ك.، 63، تس مەگاتاۋ، 3 قابات، 21 كەڭسە