ينتەرنەت يگىلىگىن كورەتىن كۇن الىس ەمەس

بيىلعى جىلدىڭ باسىنان بەرى ۇكىمەتكە بايلانىس جانە اقپاراتتاندىرۋ ماسەلەلەرى بويىنشا ازاماتتاردان 5 مىڭعا جۋىق ءوتىنىش پەن شاعىم كەلىپ ءتۇستى. ولاردىڭ باسىم بولىگى ينتەرنەتتىڭ جىلدامدىعى مەن ساپاسىنا قاتىستى. ەلدى-مەكەندەردە، ءتىپتى ءىرى قالالاردىڭ وزىندە ءموبيلدى ينتەرنەت جوق نەمەسە ساپاسى ناشار. بۇل تۋرالى پرەمەر-مينيستر ءاليحان سمايىلوۆ ۇكىمەت وتىرىسىندا ايتتى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.

ۇكىمەت باسشىسىنىڭ سوزىنشە، مەملەكەت باسشىسىنىڭ تاپسىرماسى بويىنشا ازىرلەنگەن «قولجەتىمدى ينتەرنەت» ۇلتتىق جوباسىنىڭ جۇيەلى جۇمىسى ناتيجە بەرمەي وتىر.

«مۇنداي شاعىمدار، اسىرەسە، الماتى مەن استانادا كوپ. ءموبيلدى ينتەرنەتكە قىزمەت كورسەتۋ بايلانىس وپەراتورلارىنىڭ مىندەتتەمەلەرىنە نەگە كىرمەيتىنى مۇلدەم تۇسىنىكسىز. ينتەرنەتتىڭ ساپاسى مەن جىلدامدىعىن ولشەيتىن قۇرالدار جوق. ينسپەكسيانىڭ ءوزى جول بويىنداعى جانە ەلدى مەكەندەردەگى ينتەرنەت جىلدامدىعىن ولشەي المايدى. بۇل پروبلەمالاردى شەشۋ كەرەك. قازىرگى تاڭدا ادامدار ءبىرىنشى كەزەكتە ينتەرنەتتىڭ ساپاسىنا قارايدى. جاي عانا جەلى تارتىپ بەرەتىن كەزەڭنەن وتتىك. حالىققا ساپالى بايلانىس پەن جىلدام ينتەرنەت قاجەت»، - دەدى ءاليحان سمايىلوۆ.

پرەمەر-مينيستر تۇتىنۋشىلاردىڭ تاريفتەردىڭ اقىسىن تولىعىمەن تولەپ وتىرعانى العا تارتىپ، ولاردىڭ ساپالى قىزمەتتى تالاپ ەتۋى ورىندى ەكەنىن ايتتى

«سوڭعى 3 جىلدا بايلانىس وپەراتورلارى بۇل سالاعا تارتىلعان ينۆەستيسيالاردى شامامەن 60%-كە دەيىن تومەندەتىپ جىبەرگەنىن اتاپ وتكىم كەلەدى. وپەراتورلارعا قىمبات ينفراقۇرىلىمعا قارجى سالعاننان گورى، انىقتالعان زاڭ بۇزۋشىلىقتار ءۇشىن ايىپپۇل تولەي سالعان ءتيىمدى. مۇنداي جاعدايدى تۇبەگەيلى وزگەرتۋ كەرەك. ۇسىنىلىپ وتىرعان ۇلتتىق جوبا ءدال وسى ماسەلەلەردى شەشۋگە باعىتتالعان. ونىڭ نەگىزگى ماقساتى – حالىق پەن كاسىپكەرلىك سۋبەكتىلەرىن ەڭ كەمى سەكۋندىنا 100 مبيت بولاتىن ينتەرنەتپەن قامتاماسىز ەتۋ. تالشىقتى-وپتيكالىق بايلانىس جەلىلەرىمەن 3 مىڭعا جۋىق اۋىل قامتىلۋى ءتيىس» - دەدى پرەمەر-مينيستر.

جوسپار بويىنشا، 2027 جىلعا قاراي رەسپۋبليكالىق ماڭىزى بار قالالاردىڭ 75%ء-ى جانە وبلىس ورتالىقتارىنىڭ 60%ء-ى 5G تەحنولوگياسىمەن قامتاماسىز ەتىلۋى كەرەك. بۇل رەتتە، قالا ىشىندە ۇيالى بايلانىس جابدىقتارىن ورنالاستىرۋ قاجەتتىگى تۋرالى حالىققا ءاقپاراتتىق-تۇسىندىرۋ جۇمىستارىن جۇرگىزۋ ماڭىزدى.

«ول ەڭ الدىمەن، بايلانىس ساپاسىن جاقسارتۋ جانە تۇرعىندار اراسىندا راديوفوبيانى ازايتۋ ءۇشىن كەرەك. سونداي-اق، دەرەكتەردى بەرۋ دەڭگەيى سەكۋندىنا 4-6 تەرابيتكە دەيىن بولاتىن جەلىلەردىڭ ترانزيتتىك مۇمكىندىكتەرىن ۇلعايتۋعا باسىمدىق بەرۋ قاجەت. مەملەكەت باسشىسىنىڭ تاپسىرماسى بويىنشا قازاقستان قۋاتتى دەرەكتەر ورتالىقتارى مەن ترانسشەكارالىق تالشىقتى-وپتيكالىق ماگيسترالدارى بار سيفرلىق حابقا اينالۋى ءتيىس»، -دەپ ناقتىلادى سمايىلوۆ.

بەلگىلى بولعانداي، ۇلتتىق جوبانىڭ وسى ماقساتتارىنا بيۋدجەتتەن 5 جىل ىشىندە شامامەن 560 ملرد تەڭگە ءبولۋ جوسپارلانۋدا.

«جالپى سيفرلىق دامۋ مينيسترلىگى مەن بايلانىس وپەراتورلارىنىڭ نازارىن مىنا ماسەلەلەرگە اۋدارعىم كەلەدى: ءبىرىنشى. بايلانىس وپەراتورلارى مىندەتتەمەلەرىنىڭ ساقتالۋىن ەسكەرە وتىرىپ، بارلىق جەردە بايلانىس ساپاسى مەن ينتەرنەت جىلدامدىعىنىڭ مونيتورينگىن كۇشەيتۋ قاجەت. حالىق پەن بيزنەستىڭ كوپتەگەن پروبلەمالارىنىڭ جەدەل شەشىمى وسىعان بايلانىستى. ەكىنشى. رەسپۋبليكا اۋماعىنداعى ءاربىر ەلدى مەكەنگە دەيىن تارتىلاتىن كەڭ جولاقتى ينتەرنەت ينفراقۇرىلىمىنىڭ ەكسپوزيسياسىن ايقىنداۋ قاجەت. وندا ترافيكتىڭ جىلدامدىعى ناقتى كورسەتىلۋى ءتيىس. ءۇشىنشى. قىسقا مەرزىمدە ۇلتتىق جوبانى پىسىقتاپ، پرەزيدەنت اكىمشىلىگىنە ەنگىزۋ قاجەت. حالىقتىڭ پىكىرلەرىن ەسكەرە وتىرىپ، بارلىق پروبلەمالار مۇقيات پىسىقتالۋى ءتيىس. بۇل ماسەلەنى مەن ءوز باقىلاۋىمدا ۇستايمىن»، - دەدى ءاليحان سمايىلوۆ.