ناشاقورلىققا جانە ەسىرتكى بيزنەسىنە قارسى كۇرەستىڭ 2023-2025 جىلدارعا ارنالعان كەشەندى جوسپارى ەل اۋماعىندا وسى قىلمىس تۇرىنە قارسى ءىس-قيمىلدى كۇشەيتۋگە قوسىمشا سەرپىن بەردى.
پاۆلودار وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى پروكۋراتۋرامەن كەلىسىلگەن جەدەل-تەرگەۋ ءىس-شارالارىنىڭ ناتيجەسىندە ەسىرتكىنى ينتەرنەت-دۇكەن ارقىلى وتكىزۋمەن اينالىسقان قىلمىستىق توپتىڭ ارەكەتىنە توسقاۋىل قويدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
پاۆلودار جانە ەكىباستۇز قالالارىنىڭ اۋماعىندا ءبىر ۋاقىتتا ارنايى ماقساتتاعى بولىمشە جاۋىنگەرلەرىنىڭ كۇشتىك قولداۋىمەن جەدەل-تەرگەۋ توپتارى وسى قىلمىستىق بيزنەسكە قاتىسۋشىلاردى ۇستادى.
جەدەل ۋاكىلدەر Telegram قوسىمشاسىنداعى ينتەرنەت-دۇكەن ارقىلى ماريحۋانانى ساتۋدى جولعا قويعان ۇيىمداستىرۋشىنى جانە تاعى دا باسقا ءتورت ادامدى قۇرىقتادى. ولاردىڭ قاتارىندا بۋحگالتەر، ينتەرنەت-دۇكەننىڭ اكىمشىسى، ءبۋىپ-تۇيۋشى مەن جاسىرىپ كەتۋشى بار. ءتورت مەكەن جاي بويىنشا جۇرگىزىلگەن ءتىنتۋ ناتيجەسىندە توعىز كەلىدەن استام ماريحۋانا، ساتىلىمعا دايىن ەسىرتكى، بۋىپ-تۇيۋگە جانە قولدانۋعا ارنالعان ءتۇرلى قۇرىلعىلار، قىلمىستىق بيزنەسكە قاتىسى بارىن راستايتىن تەحنيكا مەن ۇيالى تەلەفوندار، سونداي-اق ينتەرنەت-دۇكەننىڭ قاراجات اينالىمىنىڭ جازبالارى تابىلىپ، تاركىلەندى.
كۇدىكتىلەر ۇستالىپ، ۋاقىتشا ۇستاۋ يزولياتورىنا قامالدى.
ق ر قك-نىڭ 297-بابى 3-بولىگى “ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ” بويىنشا سوتقا دەيىنگى ءىس جۇرگىزۋ باستالدى.
ەستەرىڭىزگە سالا كەتەيىك، ادامدار توبىنىڭ الدىن الا ءسوز بايلاسۋىمەن، بىرنەشە رەت، اسا ءىرى مولشەردە، ەلەكتروندىق اقپاراتتىق رەسۋرستاردى پايدالانۋ ارقىلى جاسالعان بۇل قىلمىستار ءۇشىن مۇلكى تاركىلەنىپ، ون جىلدان ون بەس جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلادى. تەرگەۋ امالدارى جالعاسۋدا. ءتيىستى ساراپتامالار تاعايىندالدى. ۇيىمداسقان قىلمىستىق توپتى قۇرعانى جانە وعان قاتىسقانى ءۇشىن قىلمىستىق ءىس قوزعاۋ جوسپارلانۋدا.