مينيسترلىك قازاقستاندىقتارعا ونلاين بانكينگتىڭ ءپارولىن ءجيى اۋىستىرىپ تۇرۋعا كەڭەس بەردى.
كريمينالدىق پوليسيا دەپارتامەنتى كيبەرقىلمىسقا قارسى كۇرەس ورتالىعىنىڭ باستىعى جاندوس ءسۇيىنباي ينتەرنەت الاياقتىقتان ساقتانۋدىڭ جولدارىن اتادى، دەپ حابارلايدى Almaty-akshamy.kz قازاقپاراتقا سىلتەمە جاساپ
«ستاتيستيكا بويىنشا، حالىقتىڭ 90%-ى ينتەرنەت قولدانادى. جەلىدە بولعان كەزدە مىناداي ساقتىق شارالارىن قاپەردە ۇستاۋ كەرەك. ەشقانداي جاعدايدا ءوزىن بانك قىزمەتكەرى نەمەسە قۇقىق قورعاۋ ورگاندارىنىڭ وكىلى رەتىندە تانىستىرىپ، تەلەفون ارقىلى نۇسقاۋ بەرەتىن ادامداردىڭ سوزىنە سەنبەۋ كەرەك. قۇقىق قورعاۋ ورگاندارى ەشقانداي ارنايى وپەراسيانى تەلەفون ارقىلى جۇرگىزبەيدى. سوندىقتان پلاستيك كارتانىڭ رەكۆيزيتتەرى، اقشا اۋدارىمىن جاساعانى تۋرالى تۇبىرتەكتەر، كودتار مەن كىلت سوزدەر سياقتى جەكە باستىڭ دەرەكتەرىن ەشكىمگە، ءتىپتى بانك پەن قۇقىق قورعاۋ قىزمەتكەرلەرىنە دە بەرۋگە بولمايدى»، - دەيدى جاندوس ءسۇيىنباي.
ونىڭ ايتۋىنشا، جەكە دەرەكتەردى بەيتانىس، تەكسەرىلمەگەن سايتتارعا ەنگىزۋگە دە بولمايدى. تەلەفون ارقىلى بەرۋگە بولمايدى.
«تەكسەرمەي تۇرىپ، الدىن الا تولەم جاساۋدان اۋلاق بولۋ قاجەت. تاۋاردى العاننان كەيىن عانا اقىسىن جىبەرۋگە تىرىسقان ءجون. كۇدىكتى كەلىسىم ءۇشىن اقشا اۋدارۋعا، تابىس كوزى اشىق كورسەتىلمەگەن قارجىلىق سحەمالارعا قاتىسۋعا بولمايدى. ۇيالى تەلەفونعا تەك App Store، Play market ارقىلى جۇكتەلگەن قوسىمشالاردى ورناتىپ، قولدانۋ قاجەت»، - دەدى ءىىم وكىلى.
سونداي-اق ول بەيتانىس نومىردەن كەلگەن نەمەسە ەكرانعا قايتا-قايتا شىعا بەرەتىن سپام-حابارلامالارعا جاۋاپ بەرۋگە، سىلتەمەلەرگە كىرۋگە بولمايتىنىن ەسكەرتتى.
«الاياقتار كوبىنەسە سىلتەمە ارقىلى ءوتىپ تولەم جاساۋدى ۇسىنادى. ولاي ىستەۋگە بولمايدى. بانكينگ قىزمەتىنە كىرۋ ءۇشىن قويىلعان پارولدەردى ءجيى اۋىستىرىپ وتىرىڭىز. بانكتەردىڭ ءوزى ۇسىناتىن 3D-قورعانىس قىزمەتىن پايدالانىڭىز. گادجەتكە ليسەنزياسى بار انتيۆيرۋس باعدارلاماسىن ورناتۋ قاجەت. پارولدەردى كۇردەلى ەتىپ قۇرىپ، پايدالانۋ كەرەك. بايلانىستىڭ قاۋىپسىزدىگىن تەكسەرىپ بارىپ كىرۋ قاجەت. گادجەتتەرگە «بالادان قورعانىس» فۋنكسياسىن ورناتقان ارتىق بولمايدى. ينتەرنەتتەگى جەكە باس دەرەكتەرىن شەكتەپ، قۇپيا دەرەكتەردى ينتەرنەت ارقىلى بەرۋدەن ساق بولعان ءجون»، - دەدى ورتالىق باستىعى.