الماتىدا "قانت ساتامىن" دەپ الداعان الاياق ۇستالدى

الماتىلىق الاياق olx.kz ارقىلى 15 ادامعا "قانت ساتقان".

بۇل تۋرالى كريمينالدىق پوليسيا دەپارتامەنتى كيبەرقىلمىسقا قارسى كۇرەس ورتالىعىنىڭ باستىعى جاندوس ءسۇيىنباي ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

 «وڭىرلەردەگى تۇزەتۋ مەكەمەلەرىندە جاسالاتىن كيبەرالاياقتىقتىڭ الدىن الۋ جۇمىستارى جالعاسۋدا. مىسالى، قاراعاندى وبلىسىنىڭ كيبەرقىلمىسپەن كۇرەس بولىمشەسىنىڭ ۋاكىلدەرى قىلمىستىق اتقارۋ جۇيەسى كوميتەتىنىڭ وكىلدەرىمەن بىرگە قىلمىسكەردىڭ جولىن كەستى. الماتى وبلىسىنداعى تۇزەتۋ مەكەمەسىندە الاياقتىعى ءۇشىن جازاسىن وتەپ جاتقان ازامات ۇيالى گادجەت ارقىلى ينتەرنەت-الاياقتىققا بارعان. ناقتىراق ايتساق، الەۋمەتتىك جەلى ارقىلى تاۋار مەن قىزمەت ۇسىنۋشىلاردى تاۋىپ، سولاردىڭ سەنىمىنە كىرۋ ارقىلى مەسەندجەر-چاتتارعا مۇشە بولادى. سول چاتتاردىڭ كومەگىمەن ءوزىن جەلىنى قولدانۋشىنىڭ تانىسى نەمەسە ارىپتەسى رەتىندە تانىستىرىپ،قارىزعا اقشا سۇراعان»، - دەدى ول ونلاين بريفينگىدە.

كۇدىكتىنىڭ بۇل ارەكەتىنەن قاراعاندى، اتىراۋ، اقتوبە جانە قىزىلوردا وبلىستارىندا 30 ادام زارداپ شەككەن.

«سونداي-اق الماتى قالاسى پوليسيا دەپارتامەنتىنىڭ كريمينالدىق ساقشىلارى ەلدەگى قانت تاپشىلىعىن پايدالانىپ، وlx.kz سايتى ارقىلى الاياقتىق جاساعان ادامدى انىقتادى. ول ينتەرنەتتە كوتەرمە جانە بولشەك ساۋدادا قانت ساتاتىنى تۋرالى جالعان حابارلاندىرۋلار سالىپ وتىرعان. الايدا اقشا قولىنا تيگەن بويدا حابارسىز كەتىپ وتىرعان. وسىنداي 15 ەپيزود انىقتالدى. ول ءقازىر قاماۋدا»، - دەدى ورتالىق باستىعى.