الماتى پوليسياسى كەڭەس بەردى.
قازىرگى تاڭدا عالامتور جەلىسىنىڭ دامۋى مەن ەلەكتروندىق، كريپتوۆاليۋتالىق تولەم جۇرگىزۋدىڭ مۇمكىندىكتەرى سەبەبىنەن ينتەرنەت الاياقتىق جانە اقپاراتتىق كوممۋنيكاسيالىق جۇيە ارقىلى ۇرلىق سەكىلدى قىلمىستار كوبەيگەن. بۇل تۋرالى الماتى قالالىق پوليسيا دەپارتامەنتىندە ءمالىم ەتتى، دەپ حابارلايدى اlmaty-akshamy.kz.
«وسى ورايدا ازاماتتاردى ينتەرنەت قىزمەت تۇرلەرىن پايدالانۋدا مۇقيات بولۋعا شاقىرامىز. كۇمان تۋدىراتىن سىلتەمەلەردى اشپاڭىزدار، جەكە مالىمەتتەر (جسن، IBAN، CCV) بەرىلمەۋى كەرەك. ەگەر ءسىزدىڭ تولەم كارتاڭىزعا بەلگىسىز تۇلعالاردان اقشا تۇسسە جانە باسقا شوتقا اۋدارۋدى وتىنسە، دەرەۋ ءوزىڭىزدىڭ بانكىڭىزدىڭ Call ورتالىعىنا نەمەسە قۇقىق قورعاۋ ورگاندارىنا حابارلاڭىز. ەگەر ءسىز بەلگىسىز تۇلعانىڭ سۇراۋىن ورىنداساڭىز، الاياقتاردىڭ قۇربانى بولىپ قالۋىڭىز مۇمكىن»، – دەدى قالالىق پوليسيا دەپارتامەنتىنىڭ كريمينالدىق پوليسيا باسقارماسىنىڭ كيبەرقىلمىستارعا قارسى كۇرەس ءبولىمىنىڭ باستىعى يگور پۋدوۆكين.
بۇل رەتتە الماتى پوليسياسى ينتەرنەت الاياقتاردان ساقتانۋ جولدارىن جاريالادى:
- ەشقاشان ەشكىمگە ءوزىڭىزدىڭ بانك كارتوچكاڭىزدىڭ مالىمەتتەرىن، جەكە باسىڭىزدىڭ مالىمەتتەرىن (جەكە كۋالىك، سۋرەت، تولەم كارتاڭىزدىڭ سۋرەتىن، 3 ساندىق CCV كودىن) جولداماڭىز.
- ينتەرنەت ارقىلى ساتىپ الىناتىن تاۋارلار ءۇشىن الدىن الا تولەم جىبەرمەڭىز.
- ەگەر ءسىز جىلجىمايتىن مۇلىك، كولىك نەمەسە تاۋار ساتساڭىز تولەمدەردى قولما-قول العان دۇرىس.
- ەگەر تاۋاردىڭ، كولىكتىڭ نەمەسە جالعا بەرۋ بويىنشا حابارلاندىرۋدا الدىن الا تولەم جاساۋ كەرەك ەكەنى جازىلسا جانە بايلانىس تەك WhatsApp جەلىسى ارقىلى بولسا، ەلەكتروندىق تولەم جۇرگىزۋدىڭ ەش قاجەتى جوق.
- ءتۇرلى مەسسەندجەرلەر ارقىلى سىزگە سىلتەمەلەر كەلسە، ول الاياقتاردىڭ تۇزاعى بولۋ ابدەن مۇمكىن.
- ءتۇرلى سايتتا بانكتىك كارتوچكاڭىزدىڭ مالىمەتتەرىن جاريالاماڭىز. بۇل ءسىزدىڭ جەكە ماعلۇماتتارىڭىزدى الۋعا ارنالعان ارنايى فيشينگ سايتى بولۋى ىقتيمال.
- عالامتور جەلىسى ارقىلى ۇيىمداستىرىلاتىن ۇتىس ويىنىنا قاتىسپاۋىڭىز كەرەك.
- ۇلكەن پايدا اكەلەتىن ءتۇرلى جوبالارعا اقشا سالماڭىز. سىزگە باسقا شەتەل ابونەنتتىك ءنومىرى ارقىلى حابارلاسىپ، بيرجاعا، كريپتوۆاليۋتاعا اقشا سالۋىڭىزدى سۇراۋى مۇمكىن.
- ەگەر سىزگە بانكتىڭ قاۋىپسىزدىك قىزمەتىنەن حابارلاسسا، بانك قىزمەتكەرلەرى ءسىزدىڭ كارتاڭىزدىڭ مالىمەتتەرىن نەمەسە قۇپيا ءسوز جانە كودتى سۇرامايدى. الاياقتار سونداي-اق ءتۇرلى تەلەفون ابونەنتتىك ءنومىرىن اۋىستىرىپ كورسەتەتىن دومەن ارقىلى حابارلاسۋلارى مۇمكىن. مۇنداي جاعدايدا تەلەفون تۇتقاسىن قويا سالىڭىز.