الماتى قالاسىنىڭ وڭىرلىك كوممۋنيكاسيالار قىزمەتىنىڭ بريفينگىندە «ITeachMe» قوعامدىق قورىنىڭ ديرەكتورى زاحيرا بەگالييەۆا مۇگەدەكتىگى بار ادامدار ءۇشىن قولجەتىمدى قالالىق ورتانى قۇرۋ بويىنشا نەگىزگى كورسەتكىشتەر مەن جوسپارلاردى ايتتى، دەپ حابارلايدى aqshamnews.kz
وكق سپيكەرى اتاپ وتكەندەي، الماتى قالاسى ينكليۋزيۆتى ورتا قۇرۋ بويىنشا قازاقستاندا كوشباسشى ورىنعا يە. 2024 جىلى كوپتەگەن ماڭىزدى جوبالار جۇزەگە اسىرىلدى جانە 2025 جىل تەڭ مۇمكىندىكتەر قوعامىن قۇرۋ جولىندا ماڭىزدى كەزەڭ بولماق. مۇگەدەكتىگى بار ادامدار ءۇشىن كەدەرگىلەردى جويۋعا جانە قۇقىقتارىنىڭ تەڭدىگىن قامتاماسىز ەتۋگە باسا نازار اۋدارىلادى.
نەگىزگى جەتىستىكتەردىڭ ىشىندە قالا ءومىرىنىڭ 15 باعىتى مەن 90 جوبانى قامتيتىن ۇزدىك الەمدىك تاجىريبەلەرگە نەگىزدەلگەن «ينكليۋزيۆتى الماتى» باعدارلاماسى اتاپ ءوتىلدى. ول ءبىلىم بەرۋ، دەنساۋلىق ساقتاۋ، مادەنيەت جانە سپورتتا تەڭ مۇمكىندىكتەر جاساۋعا باعىتتالعان.
«حالىقارالىق ساياسات اياسىندا قازاقستان مۇگەدەكتەردىڭ قۇقىقتارى تۋرالى كونۆەنسيانى راتيفيكاسيالاپ، 2023 جىلى وعان فاكۋلتاتيۆتىك حاتتاماعا قول قويدى. بۇل باستامالار مەملەكەت دەڭگەيىندە الەۋمەتتىك قورعاۋدى كۇشەيتۋگە ىقپال ەتەدى»، - دەپ ءبولىستى ز. بەگالييەۆا.
الماتىدا قالالىق ساياساتقا ينكليۋزيۆتى تاسىلدەردى بەلسەندى ەنگىزەتىن ينكليۋزيا ماسەلەلەرى جونىندەگى شتاتتان تىس كەڭەسشىنىڭ ءرولى كۇشەيتىلدى.
2025 جىلى 2025-2030 جىلدارعا ارنالعان ينكليۋزيۆتى ساياسات تۇجىرىمداماسىنىڭ جاڭا كەزەڭىن ىسكە اسىرۋ باستالادى. نەگىزگى ماقسات - مۇگەدەكتىكتىڭ مەديسينالىق جانە قايىرىمدىلىق مودەلىنەن الەۋمەتتىك جانە ادام قۇقىقتارىن قورعاۋعا كوشۋ. بۇل اركىمنىڭ تولىققاندى ءومىر سۇرۋىنە جاعداي جاساي وتىرىپ، فيزيكالىق، قۇقىقتىق جانە اقپاراتتىق كەدەرگىلەردى جويۋعا مۇمكىندىك بەرەدى.
سونىمەن قاتار، قالالىق باعدارلامالاردى ازىرلەۋدە قولدانىلاتىن بەرليننىڭ تاجىريبەسىنە ەرەكشە نازار اۋدارىلادى. بۇل ىنتىماقتاستىق العاشقى جەمىسىن بەردى: الماتى ءوزىنىڭ «ينكليۋزيۆتى الماتى» باعدارلاماسىن ازىرلەدى.
قورىتىندىلاي كەلە، ز.بەگالييەۆا بۇل شارالاردىڭ ءساتتى جۇزەگە اسىرىلۋى الماتىعا ءاربىر تۇرعىن فيزيكالىق مۇمكىندىكتەرىنە قاراماستان تولىققاندى جانە بەلسەندى ءومىر سۇرە الاتىن قالا بولۋعا مۇمكىندىك بەرەتىنىن اتاپ ءوتتى.