مەملەكەت باسشىسى جاريالاعان «جۇمىسشى ماماندىقتارى جىلى» اياسىندا ەكونوميكادا سۇرانىسقا يە سالالار بويىنشا ماماندار دايارلاۋعا ەرەكشە نازار اۋدارىلىپ وتىر. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك حابارلادى.
ونىڭ ايتۋىنشا، بيىل مەكتەپتى 216 مىڭ تۇلەك ءتامامداپ، جوعارى بىلىمگە قادام باستى. ءسۇيىنشى جاڭالىق — ءدال وسى جىلى بولىنگەن مەملەكەتتىك ءبىلىم بەرۋ گرانتتارىنىڭ 60%-دان استامى ينجەنەرلىك جانە تەحنيكالىق ماماندىقتارعا باعىتتالعان. جالپى باكالاۆريات دەڭگەيىندە 78 مىڭعا جۋىق گرانت، ال ماگيستراتۋرا مەن دوكتورانتۋراعا 93 مىڭنان استام گرانت بولىنگەن. ەڭ جوعارى سۇرانىسقا يە ءۇش باعىت بويىنشا: پەداگوگيكاعا — 13 مىڭ، اقپاراتتىق تەحنولوگيالار مەن جاساندى ينتەللەكتكە — 11 مىڭ، ال ينجەنەرلىك سالاعا — 18 مىڭنان استام گرانت ءبولىنىپ وتىر.
مينيستر اتاپ وتكەندەي، بيىلدان باستاپ سيرەك جانە قاجەتتى ماماندىقتارعا — ۆەتەريناريا، ەنەرگەتيكا، سۋ شارۋاشىلىعى، يرريگاسيا، گيدروتەحنولوگيالار سەكىلدى سالالارعا وڭىرلىك كۆوتالار ەنگىزىلدى. بۇل كۆوتالار ەندى ءار ءوڭىردىڭ ناقتى ەكونوميكالىق قاجەتتىلىگىنە ساي بولىنەدى. مىسالى، بىلتىر اشىلعان قازاق ۇلتتىق سۋ شارۋاشىلىعى جانە يرريگاسيا ۋنيۆەرسيتەتى بيىلدان باستاپ قولداۋ رەتىندە وسى باعىتتاعى ارنايى كۆوتالاردى الىپ وتىر.
جاڭا ەنگىزىلگەن ماڭىزدى باستامالاردىڭ ءبىرى — اسكەري بورىشىن وتەپ كەلگەن ازاماتتارعا ارنالعان ءبىلىم بەرۋ گرانتتارى. قورعانىس مينيسترلىگىمەن بىرلەسكەن جۇمىستار ناتيجەسىندە بيىل تۇڭعىش رەت اسكەري بورىشىن وتەگەن جاستارعا 2 مىڭعا جۋىق گرانت ءبولىندى. بۇل شارا ازاماتتاردى اسكەري قىزمەتكە ىنتالاندىرۋ ماقساتىندا قولعا الىندى.
سونىمەن قاتار، اتا-اناسىنان ايىرىلعان جەتىم بالالار مەن الەۋمەتتىك وسال توپتاردان شىققان تالاپكەرلەر ءۇشىن دە ارنايى كۆوتالار قاراستىرىلعان. تاعى ءبىر جاعىمدى جاڭالىق — بيىل «سەرپىن» باعدارلاماسى اياسىندا بۇرىن-سوڭدى بولماعان ناتيجە تىركەلدى: گرانتتاردىڭ 83%-ى يگەرىلدى. بۇل كورسەتكىش بۇعان دەيىن 40–50% دەڭگەيىندە بولعان بولسا، بىلتىر 67%-عا جەتكەن ەدى. ءقازىر باعدارلاما اياسىندا جاستار ەلىمىزدىڭ 9 وڭىرىندە ءبىلىم الىپ جاتىر.