تەرگەۋ جالعاسىپ جاتىر.
سىبايلاس جەمقورلىققا قارسى قىزمەت باس پروكۋراتۋرامەن بىرلەسىپ پايدالى قازبالار كەن ورىندارىن بەرۋدىڭ زاڭدىلىعىن تەكسەرۋ ناتيجەلەرى بويىنشا يندۋستريا جانە ينفراقۇرىلىمدىق دامۋ مينيسترلىگىنىڭ لاۋازىمدى تۇلعالارىنا قاتىستى سوتقا دەيىنگى تەرگەپ-تەكسەرۋدى باستادى، دەپ حابارلايدى Almaty-akshamy.kz.
«مينيسترلىكتىڭ لاۋازىمدى ادامدارى جەكەلەگەن كاسىپكەرلىك سۋبەكتىلەرىنىڭ مۇددەسىندە ارەكەت ەتە وتىرىپ، بارلاۋ سىلتاۋىمەن اۋكسيون وتكىزبەستەن پايدالى قاتتى قازبالار قورى بەلگىلەنگەن كەن ورىندارىن زاڭسىز بەرگەنى انىقتالدى. بۇرىن جۇرگىزىلگەن بارلاۋ فاكتىسى قۇجاتتاردى بۇرمالاۋ ارقىلى ادەيى جاسىرىلعان»، - دەلىنگەن سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتىنىڭ حابارلاماسىندا.
ناتيجەسىندە، لاۋازىمدى تۇلعالارمەن ۇلەستەس كاسىپكەرلەر قول قويۋ بونۋسىنىڭ ەڭ تومەنگى قۇنى ءۇشىن نارىققا قاتىسۋشىلاردىڭ باسەكەلەستىك، قولجەتىمدىلىك جانە تەڭ قۇقىقتىلىق قاعيداتتارىن بۇزا وتىرىپ، وندىرۋگە دايىن كەن ورىندارىن الدى.
كەن ورىندارىن ساتۋ بويىنشا اۋكسيوندار وتكىزىلمەگەندىكتەن، مەملەكەت ونداعان ميلليارد تەڭگە الماعان.
ا.ج. 7 قاراشاسىندا لاۋازىمدىق وكىلەتتىكتەرىن اسىرا پايدالاندى دەگەن كۇدىك بويىنشا بۇرىنعى يندۋستريا جانە ينفراقۇرىلىمدىق دامۋ ۆيسە-مينيسترى ت. توقتابايەۆ ۇستالدى. تەرگەۋ سوتتىڭ سانكسياسىمەن ت. توقتابايەۆتىڭ جانە ونىڭ جاقىن تۋىستارىنىڭ (ەليتالىق جەكە ۇيلەر، جەر ۋچاسكەلەرى، Cadillac Escalade ماركالى اۆتوكولىكتەرى، Mercedes-Benz Maybach S580 4 Matic، ەكى BMW X5 Xdrive40I، Bentley Bentayga V8) قىمبات جىلجىمالى جانە جىلجىمايتىن مۇلكى انىقتالدى جانە قاماۋعا الىندى.
ايتا كەتەيىك، تەرگەۋ جالعاسىپ جاتىر. تەرگەۋ مۇددەسى ءۇشىن وزگە دە اقپارات جاريا ەتىلمەيدى.