يندونەزيانىڭ استاناسى دجاكارتادا ديماش پەن قازاقستاننىڭ مادەنيەتىنە ارنالعان 10 كۇندىك كورمە ءوتتى.
ءىس-شارا قوناقتارىنا ورىنداۋشىنىڭ كونسەرتتەرىنىڭ ءبىرى كورسەتىلدى، سونداي-اق قازاقستاننان سۋرەتتەر مەن كادەسىيلار ۇسىنىلدى، دەپ حابارلايدى Almaty-akshamy.kz Dimashnews.com سايتىنا سىلتەمە جاساپ.
كورمە 2022 جىلعى 29 ماۋسىمنان 8 شىلدەگە دەيىن «يندونەزيا رەسپۋبليكاسىنىڭ ۇلتتىق كىتاپحاناسىندا» ءوتتى. ءىس-شارانى قازاقستان رەسپۋبليكاسىنىڭ يندونەزياداعى ەلشىلىگى مەن يندونەزيا رەسپۋبليكاسىنىڭ نۇر-سۇلتانداعى ەلشىلىگىنىڭ قولداۋىمەن ديماش قۇدايبەرگەن DIDFC يندونەزيالىق فان-كلۋبى ۇيىمداستىردى.
ءىس-شارا بارلىق نيەت بىلدىرۋشىلەر ءۇشىن تەگىن جانە اشىق بولدى. اشىلۋ ءراسىمى قىزىقتى ءوتتى. Dears بارلىق قوناقتار ءۇشىن ديماشتىڭ «دايديداۋ» جانە «ليۋبوۆ ۋستاۆشيح لەبەدەي» اندەرىمەن تاڭعاجايىپ قويىلىمدار دايىندادى، ولار ءتۇپنۇسقادا دا، يندونەزيالىق نۇسقادا دا شىرقالدى.
مۇحتار اۋەزوۆتىڭ «ەڭلىك-كەبەك» اتتى بەلگىلى پوەماسىن وقىپ، قازاقستاندىق ورىنداۋشىنىڭ شىعارماشىلىعىمەن تانىسقاننان كەيىن قازاق ءتىلىن بەلسەندى مەڭگەرە باستاعان ديماشتىڭ جانكۇيەرى تيتا دجادجوسمان قوناقتاردى تاڭ قالدىردى.
سونداي-اق، كورمەنىڭ اشىلۋ كۇنى بارلىق قوناقتار ءۇشىن ديماشتىڭ «D-Dynasty» كونسەرتىن تاماشالاۋ ۇيىمداستىرىلدى.
وسىدان كەيىن رەسمي اشىلۋ ءراسىمى ءوتتى. Didfc فان-كلۋبى جانە ەكى ەلشىلىك وكىلدەرى العى ءسوز سويلەدى.
كورمەدە ديماشتىڭ فوتوسۋرەتتەرى، ونىڭ شىعارماشىلىعى تۋرالى اقپارات، سونداي-اق قازاقستاننىڭ سۋرەتتەرى مەن كادەسىيلارى، ونىڭ ىشىندە كەلۋشىلەر تاماشالاي الاتىن دومبىرا مەن ءداستۇرلى كيىمدەر ۇسىنىلدى.