قازاقستان اۋىل شارۋاشىلىعى باعىتىندا جوعارى الەۋەتىنە قاراماستان، تۇقىم يمپورتىنا تاۋەلدى.
ەلىمىزدىڭ ءداندى جانە بۇرشاق تۇقىم داقىلدارىنا قاجەتتىلىك 2،0 ملن توننانى قۇرايدى، ناقتىراق ايتساق، مايلى داقىلدار بويىنشا 87 مىڭ توننا، مال ازىقتىق داقىلدارى بويىنشا 23 مىڭ توننا، كارتوپ بويىنشا 289 مىڭ توننانى قاجەت ەتەدى. اتالعان ماسەلەنى شەشۋ ءۇشىن قازاقستان ۇكىمەتى سەلەكسيا جانە تۇقىم شارۋاشىلىعىن دامىتۋدىڭ 2024 – 2028 جىلدارعا ارنالعان كەشەندى جوسپارىن بەكىتتى، دەپ حابارلايدى aqshamnews.kz.
ءقازىردىڭ وزىندە ەلىمىزدە 284 سەرتيفيكاتتالعان ءتۇپنۇسقا جانە ەليتالىق تۇقىم وندىرۋشىلەر جۇمىس ىستەيدى، سەلەكسيامەن 27 مامانداندىرىلعان مەكەمە اينالىسادى.
بۇل باعىتتا بيىل 90 جىلدىق مەرەيتويىن اتاپ وتەتىن قازاق ەگىنشىلىك جانە وسىمدىك شارۋاشىلىعى عىلىمي-زەرتتەۋ ينستيتۋتى جەتەكشى ءرول اتقارۋدا. ينستيتۋت سترەسس فاكتورلارىنا ءتوزىمدى جانە باسەكەگە قابىلەتتى سورتتار مەن بۋداندار جاساۋمەن، سونداي-اق ورگانيكالىق ەگىنشىلىكتى دامىتۋمەن اينالىسادى. قازاق ەگىنشىلىك جانە وسىمدىك شارۋاشىلىعى عزي عالىمدارى 650-دەن استام سورتتار مەن بۋداندار جاساپ شىعاردى، ونىڭ 206-سى اۋدانداستىرىلعان.
قازىرگى تاڭدا ەليتالىق تۇقىم وسىرەتىن شارۋاشىلىقتارمەن سەرىكتەستىك ماسەلەسىنە ەرەكشە كوڭىل بولىنەدى. ماسەلەن، الماتى وبلىسىندا وسىنداي توعىز شارۋاشىلىقتىڭ تورتەۋى قازاق ەگىنشىلىك جانە وسىمدىك شارۋاشىلىعى عزي-مەن تىعىز بايلانىستا. الايدا، ساراپشىلار كوپتەگەن شارۋاشىلىقتار ءالى كۇنگە دەيىن سورتتى جاڭارتۋمەن اينالىسپايتىنىن نەمەسە شىعۋ تەگى بەلگىسىز تۇقىمداردى ساتىپ الاتىنىن اتاپ ءوتتى. بۇل ماسەلەنى شەشۋ ءۇشىن ينستيتۋت جىل سايىن فەرمەرلەردى وقىتۋ جانە جاڭا تەحنولوگيالاردى ەنگىزۋ ءۇشىن دەمونستراسيالىق الاڭدار ازىرلەپ تۇرادى.
تۇقىم شارۋاشىلىعىن دامىتۋداعى ماڭىزدى قادام 2023 جىلدىڭ قازان ايىندا قازاق ەگىنشىلىك جانە وسىمدىك شارۋاشىلىعى عزي بازاسىندا جوعارى ساپالى تۇقىم ءوندىرۋ ورتالىعىنىڭ اشىلۋى بولدى. مۇندا تۇقىمدار بەس ساتىلى تازارتۋدان جانە كاليبرلەۋدەن وتەدى.
بيىل شۆەدتىك «ThermoSeed» جابدىعى ارقىلى تۇقىمداردى سۇرىپتاۋ جانە تەرميالىق وڭدەۋ بويىنشا ءوندىرىس ورنىنىڭ قۇرىلىسى باستالادى. تۇقىمداردى وڭدەۋدىڭ ورگانيكالىق ادىستەرىن، ونىڭ ىشىندە قىشا ۇنتاعى مەن تيميان مايى سياقتى تابيعي قوسىلىستاردى قولدانۋدى ەنگىزۋ جوسپارلانۋدا.
بۇرىنعى «اگروپارك وڭتۇستىك» جاۋاپكەرشىلىگى شەكتەۋلى سەرىكتەستىگىنىڭ جەر رەسۋرستارى ينستيتۋتىنا قوسىلۋىنىڭ ارقاسىندا ەليتالىق تۇقىم ءوندىرىسى 4،5–5 ەسەگە ۇلعايتىلاتىن بولادى. ايتا كەتەيىك، قازاق ەگىنشىلىك جانە وسىمدىك شارۋاشىلىعى عزي جىل سايىن 1500 توننادان استام ءداندى ماساق داقىلدارىنىڭ تۇقىمىن، 300 توننا داندى-جەمشوپ جانە 100 توننا ءداندى-بۇرشاقتى داقىلداردى، سونداي-اق جۇگەرى، ماقسارى جانە جەمشوپ داقىلدارىنىڭ تۇقىمىن وندىرەدى جانە وتكىزەدى.