قىس كەلىسىمەن تۇماۋمەن اۋىرۋ جيىلەيدى. كوپ اۋىرماۋ ءۇشىن يممۋنيتەتتىڭ ءرولى ماڭىزدى. كوپشىلىك يممۋنيتەتتى ارتتىرۋ ءۇشىن بيولوگيالىق بەلسەندى قوسپالار (ببق) ىشەدى، سۋپەرفۋد جەيدى جانە اعزانى تازارتاتىن پروسەدۋرالار جاسايدى. الايدا يممۋنيتەتتى كۇشەيتۋ مۇمكىن بە؟ جىلدام ناتيجەگە جەتكىسى كەلۋدىڭ قانداي قاۋىپتەرى بار؟ اقش-تىڭ جەتەكشى عىلىمي زەرتحانالارىندا جۇمىس ىستەپ ءجۇرىپ، وسى پروبلەمانى تەرەڭ زەرتتەگەن يممۋنولوگ-دارىگەر الماز شارمان وسى جايىندا مىناداي كەڭەس بەرەدى.
ۇيلەسىمدى تاماقتانىڭىز. تەك سۋپەرفۋدتەردى ەمەس، ءارتۇرلى جانە قابىنۋعا قارسى ديەتانى ۇستانۋ ماڭىزدى؛
يممۋندىق جۇيەنى تىم بەلسەندى ەتۋگە ۇمتىلماڭىز. شامادان تىس بەلسەندى يممۋندىق جۇيەگە ۇمتىلۋ زيان. يممۋندىق جۇيە تەپە-تەڭدىكتە جۇمىس ىستەۋى كەرەك؛
العاشقى سيمپتومداردى بىردەن دارىمەن باسپاڭىز. ءبىز اۋىرعان كەزدە ول ميعا سيگنالدار جىبەرەدى، بۇل كەزدە ءبىز السىزدىك سەزىنىپ، جابىرقاڭقى كۇيگە ءتۇسۋىمىز مۇمكىن. بۇل اعزانىڭ قالىپقا كەلۋ قاجەت ەكەنىن بىلدىرەدى. ونى ەلەمەي، سيمپتومداردى دارى-دارمەكتەرمەن باسۋعا بولمايدى؛
ميكروبيوما ساۋلىعىن ساقتاڭىز. يممۋنيتەت جۇمىسىنا ميكروبيوما جاعدايى ايتارلىقتاي اسەر بەرەدى. سەبەبى العاشقى جىلىندا ميكروبتار يممۋندى جۇيەنى زەرتتەپ، ۇيرەنەدى. الايدا سوڭعى جىلدارى ادامداردا ميكروبيوما تەپە-تەڭدىگى بۇزىلعان. وعان انتيبيوتيكتەردى كوپ ءىشۋ، تاماقتانۋدىڭ وزگەرۋى جانە قايتا وڭدەلگەن تاعامداردى جەۋ اسەر ەتتى. بۇل اللەرگيانىڭ جانە اۋتويممۋندى اۋرۋلاردىڭ كوبەيۋىنە اكەلدى. سوندىقتان ميكروبيوما جاعدايىن جاقسارتۋ ءۇشىن دۇرىس تاماقتانۋ ماڭىزدى. راسيونعا جەمىستەر، كوكونىستەر، پايدالى مايلار، اقۋىز، مايلى بالىق جانە جاسۇنىق قوسىڭىز؛
كۇيزەلىستەن ارىلىڭىز. كۇيزەلىستىڭ يممۋنيتەتكە جاعىمسىز اسەرى عىلىمي دالەلدەنگەن. تىنىس الۋ جاتتىعۋلارى، تازا اۋادا سەرۋەندەۋ جانە گادجەتتەردەن دەمالۋ كۇيزەلىستى ازايتۋعا جانە يممۋنيتەت جۇمىسىن جاقسارتۋعا كومەكتەسەدى؛
ۇيقىنى رەتكە كەلتىرىڭىز. يممۋندى جۇيەنىڭ جاقسى جۇمىس ىستەۋىندە ۇيقىنىڭ ءرولى زور. ەگەر ۇيقىڭىز قانباسا، ۆيرۋستارمەن كۇرەسەتىن يممۋندى جاسۋشالاردىڭ بەلسەندىلىگى تومەندەيدى.