قازاقستاندىق ديدجەي ءارى مۋزىكالىق پروديۋسەر يمانبەك زەيكەنوۆ («Imanbek» لاقاپ اتىمەن تانىمال) تاعى دا «گرەممي» مۋزىكالىق سىيلىعىنا نوميناسيالاندى.
بۇل جولى ول ارگەنتينالىق ءانشى Taichu-مەن بىرىگىپ جازعان كومپوزيسياسىمەن «Best Latin Electronic Music Performance» (لاتىن ەلەكترونيكاسى بويىنشا ۇزدىك ورىنداۋ) ساناتىندا ب ا ق سىنايدى، - دەپ حابارلايدى Aqshamnews.kz.
2025 جىلدىڭ 18 قىركۇيەگىندە جاريالانعان نومينانتتار تىزىمىندە يمانبەكتىڭ ەسىمى قايتا اتالدى. بۇل – ونىڭ اتى اڭىزعا اينالعان رەميكسىنەن كەيىنگى كەزەكتى حالىقارالىق جەتىستىگى.
يمانبەك 2019 جىلى Saint Jhn-نىڭ «Roses» انىنە جاساعان رەميكسىمەن جاھانعا تانىلعان بولاتىن. سول تۋىندىسى ءۇشىن ول 2021 جىلى «گرەممي» سىيلىعىن جەڭىپ الىپ، اتالعان ماراپاتقا يە بولعان تۇڭعىش قازاقستاندىق رەتىندە تاريحتا قالدى. سونىمەن قاتار، ول تمد مەن بۇرىنعى كسرو ەلدەرى اراسىندا «كلاسسيكالىق ەمەس مۋزىكا» جانرىندا ماراپات العان العاشقى مۋزىكانت اتانعان ەدى.
سوڭعى بەس جىل ىشىندە «Roses» رەميكسى YouTube پلاتفورماسىندا 367 ميلليوننان استام قارالىم جيناپ، الەمدىك دەڭگەيدەگى ءساتتى جوبالاردىڭ بىرىنە اينالدى.
جاڭا نوميناسيا جايلى جاڭالىق تاراعان سوڭ، الەۋمەتتىك جەلى قولدانۋشىلارى يمانبەكتى قىزۋ قولداپ، جىلى لەبىزدەرىن بىلدىرۋدە. تىڭدارماندار:
«قۇتتىقتايمىن، سەن بۇعان ابدەن لايىقسىڭ!»
«كەرەمەت! ادەتتەگىدەي – وت!»
«سەن – ۇزدىكسىڭ!» – دەپ پىكىر قالدىرۋدا.