سۋ رەسۋرستارى جانە يرريگاسيا مينيسترلىگى ءقازىر سۋ قويمالارىندا جينالعان تاسقىن سۋىن ۇتىمدى پايدالانۋ بويىنشا بەلسەندى جۇمىس جۇرگىزىپ جاتىر.
ىلە ترانسشەكارالىق وزەنىنىڭ اعىنى الماتى وبلىسىنىڭ قاپشاعاي سۋ قويماسىنان بالقاش كولىنە شامامەن 2،3 تەكشە شاقىرىم كولەمىندە ەكولوگيالىق ماقساتتا سۋ جىبەرۋگە مۇمكىندىك بەردى، دەپ حابارلايدى Almaty-akshamy.kz سالا ءمينيسترلىنىڭ اقپاراتىنا سۇيەنىپ.
جالپى، تاسقىن سۋى بارلىق سۋ قويمالارىن تولتىرۋعا، ءتىپتى قۇرعاق ايماقتاردا دا سۋ جيناۋعا مۇمكىندىك بەردى، بۇل اۋىل شارۋاشىلىعى، ونەركاسىپ جانە اۋىز سۋ ءۇشىن ماڭىزدى. سونداي-اق، اتىراۋ وبلىسىنا كەلگەن تاسقىن سۋى كاسپيي تەڭىزىنە جىبەرىلەتىنىن، ول ءۇشىن ءقازىر قوسىمشا كانال قازىلىپ جاتقانىن قوسا كەتۋ كەرەك.