كريميناليستيكالىق بولىمشەلەردىڭ قىزمەتكەرلەرى قوسىمشا تارتىلدى
تارتىپسىزدىكتەر كەزىندە الماتى قالاسى ەڭ كوپ زارداپ شەكتى، وسىعان بايلانىستى، سونداي-اق كاسىپكەرلەردىڭ ءوتىنىشىن ەسكەرە وتىرىپ، ءىىم وڭىرلىك پوليسيا دەپارتامەنتتەرىنەن جەدەل-تەرگەۋ جانە كريميناليستيكالىق بولىمشەلەردىڭ قىزمەتكەرلەرى قوسىمشا تارتىلدى. ناتيجەسىندە وقيعا بولعان جەردى جانە زاقىمداردى تىركەپ، سونداي-اق قاجەتتى زاتتاي دالەلدەمەلەردى الىپ، بارلىق وبەكتىلەردى تەكسەرۋدى قىسقا مەرزىمدە اياقتاۋعا مۇمكىندىك تۋدى. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە ق ر ءىىم تەرگەۋ دەپارتامەنتىنىڭ باستىعى سانجار ءادىلوۆ مالىمدەدى.
«قازىرگى ۋاقىتتا ءىىم كريميناليستەرى تاركىلەنگەن ىزدەر بويىنشا قىلمىسكەرلەردىڭ جەكە باسىن انىقتاۋ ۇستىندە. تەرگەۋشىلەر ءقازىردىڭ وزىندە 15 مىڭنان استام تەرگەۋ ارەكەتتەرىن جۇرگىزدى، ولاردىڭ ىشىندە جابىرلەنۋشىلەردەن، كۋالاردان جانە كۇدىكتىلەردەن جاۋاپ الۋ، ولاردىڭ اراسىنداعى بەتپە-بەت ستاۆكالار، تەكسەرۋلەر، ءتىنتۋ جانە باسقا دا شارالار. تەرگەۋ ورگاندارىنا دالەلدەمەلەر جيناۋعا جانە قۇقىق بۇزۋشىلاردى ۇستاۋعا جاردەمدەسەتىن ازاماتتارعا ەرەكشە العىس بىلدىرگىم كەلەدى. مىسالى، الماتى وبلىسىنىڭ ەلدى مەكەندەرىنىڭ بىرىندە تۇرعىندار ۇرلانعان قارۋدىڭ 6 بىرلىگىن ساتۋ ارەكەتىنىڭ جولىن كەستى، ولار پوليسياعا تاپسىرىلدى. اتالعان فاكتى بويىنشا سوتقا دەيىنگى تەرگەۋ باستالدى جانە كۇدىكتىلەر ۇستالدى. ولاردىڭ الماتى قالاسى اۋەجايىنىڭ عيماراتىنداعى ساۋدا نۇكتەلەرىن توناۋعا قاتىسى بار ەكەنى انىقتالدى»، - دەدى پوليسەي.