بۇل 2022 جىلعى 1 قىركۇيەككە دەيىن اكەلىنگەن كولىكتەرگە قاتىستى.
ىشكى ىستەر مينيسترلىگى قازاقستانعا ەاەو-دان اكەلىنگەن كولىكتەردى ۋاقىتشا تىركەۋگە كىرىستى، دەپ حابارلايدى Almaty-akshamy.kz
ءىىم 17 شىلدەدەن باستاپ بۇرىنعى تىركەلگەن جەرى بويىنشا ەسەپتەن شىعارىلماعان نەمەسە شەكتەۋلەرگە بايلانىستى زاڭداستىرىلماعان، 2022 جىلعى 1 قىركۇيەككە دەيىن ەۋرازيالىق ەكونوميكالىق وداق ەلدەرىنەن قازاقستانعا اكەلىنگەن اۆتوكولىكتەردى بەس جىلعا ۋاقىتشا تىركەۋدى باستادى.
ازاماتتارعا اۆتوكولىكتەرمەن تۋىنداعان زاڭدى ماسەلەلەردى شەشۋ جانە ولاردى قۇقىقتىق سالاعا ەنگىزۋ ءۇشىن ۋاقىت بەرىلىپ وتىر. ۋاقىتشا تىركەۋ ءۇشىن كولىك قۇرالدارىنىڭ يەلەرى “ۋاقىتشا تىركەۋ” تىزىمىنە اۆتوكولىكتىڭ VIN-كودىن ەنگىزۋ ءۇشىن وتىنىشپەن جانە راستايتىن قۇجاتتارىمەن اكىمشىلىك پوليسيا باسقارماسىنىڭ پروسەسسينگتىك ورتالىعىنا جۇگىنۋى قاجەت.
ق ر ءىىم-نىڭ حابارلاۋىنشا، “ۋاقىتشا تىركەۋ” تىزىمىنە ەنگىزگەننەن كەيىن كولىك قۇرالىنىڭ يەسى ەلەكتروندى ۇكىمەت پورتالى ارقىلى كولىكتى تىركەۋگە ءوتىنىم بەرەدى. سودان كەيىن 10 مينۋت ىشىندە اۆتوماتتى تۇردە تەكسەرۋ جۇزەگە اسىرىلادى. وڭ ناتيجە بولعان جاعدايدا كولىك يەسىنىڭ جەكە كابينەتىنە ءساتتى تەكسەرۋ تۋرالى جانە مەملەكەتتىك كورپوراسيا جانىنداعى تەكسەرۋ پۋنكتىنە كولىك قۇرالىن ۇسىنۋ قاجەتتىگى تۋرالى حابارلاما جىبەرىلەدى.
تەكسەرۋ پۋنكتىندە كريميناليست 15 مينۋت ىشىندە كولىك قۇرالىنىڭ نومىرلىك اگرەگاتتارىن سالىستىرىپ تەكسەرەدى. تەكسەرۋ ناتيجەلەرى وڭ بولعان كەزدە كولىك يەسى ەلەكتروندىق كەزەك بويىنشا مەملەكەتتىك كورپوراسيا قىزمەتكەرىنە اۆتوكولىكتى تىركەۋگە قۇجاتتاردى تاپسىرۋ ءۇشىن جولدانادى، ول جەردە مەملەكەتتىك ءنومىر (9 660 تگ) مەن مەملەكەتتىك تىركەۋ قۇجاتى (4 313 تگ) ءۇشىن مەملەكەتتىك باج تولەپ، كولىك قۇرالىن بەس جىلعا تىركەۋ، سونىمەن قاتار كورسەتىلگەن مەرزىم وتكەننەن كەيىن ونى كەرى اكەتۋ تۋرالى مىندەتتەمەگە قول قويادى.
"اتاپ ءوتۋ قاجەت، تىركەۋ قۇجاتتارىنىڭ ءتۇپنۇسقالارى جانە مەملەكەتتىك تىركەۋ نومىرلىك بەلگىلەرى كولىك قۇرالىنىڭ تىركەلگەن جەرى بويىنشا مەملەكەتتىك كورپوراسيا فيليالىندا ۋاقىتشا تىركەۋ مەرزىمى وتكەنگە دەيىن ساقتالادى"، – دەدى ق ر ءىىم اپك باسقارما باستىعى ورىنباسارىنىڭ مىندەتىن اتقارۋشى التىنبەك جامالييەۆ.
تىركەۋ تۋرالى كۋالىكتىڭ ايرىقشا بەلگىسىندە قازاقستان رەسپۋبليكاسىنان تىس جەرلەرگە شىعۋ جانە يەلىكتەن شىعارۋ قۇقىعىنسىز دەگەن جازبا، تىركەۋدىڭ قولدانىلۋ مەرزىمى، سونداي-اق اۆتوكولىكتىڭ بۇرىنعى شەتەلدىك يەسىنىڭ دەرەكتەرى كورسەتىلەدى.