پاريج وليمپياداسىندا توپ جارىپ، جۇلدە العان دينامولىق سپورتشىلار ىشكى ىستەر مينيسترلىگىندە بولدى.
سپورتشىلار ۆەدومستۆو مۇراجايىندا تاريحپەن تانىسىپ، ەستەلىك كىتابىنا قولتاڭبا قويىپ، جىلى لەبىزدەرىن جازدى. جەڭىمپازدار مەن جۇلدەگەرلەردى جارقىن جەتىستىكتەرىمەن مينيستر ەرجان سادەنوۆ قۇتتىقتادى، دەپ حابارلايدى aqshamnews.kz Polisia.kz-كە سىلتەمە جاساپ.
– ءبىز سىزدەردىڭ ءارقايسىلارىڭىزدى ماقتان تۇتامىز. قانداي سايىسقا شىقساڭىزدار دا، جەڭىستى بولسىن! بۇل جالپى قازاق ەلىنە قوسىپ جاتقان ۇلەستەرىڭىز. تاعى دا سىزدەردى شىن جۇرەكتەن قۇتتىقتايمىن! – دەدى پوليسيا ۆەدومستۆوسىنىڭ باسشىسى.
ايتا كەتۋ كەرەك، “دينامو” سپورت ۇيىمىنىڭ سپورتشىلارى پاريجدەگى وليمپيادا ويىندارىندا ءبىر التىن (ەلدوس سمەتوۆ)، ءبىر كۇمىس (نۇربەك ورالباي) جانە ەكى قولا (نازىم قىزايباي، الەكساندرا لە) جەڭىپ الدى.
– ۇلكەن راقمەتىمدى ايتامىن قازاق ەلىنە! پاريجدە بولعاندا قولداۋدى سەزىندىك. سونداي-اق ىشكى ىستەر مينيسترلىگىنە العىسىمدى بىلدىرەمىن. بۇيىرتسا، كەلەسى وليمپيادا ويىندارىندا كۇمىس مەدالىمدى التىنعا اينالدىرۋعا بارىمدى سالامىن. ءوسىپ كەلە جاتقان جاس سپورتشىلارعا ەڭبەك ەتىڭىزدەر، سىنباڭىزدار دەگىم كەلەدى، – دەدى بوكستان وليمپيادا ويىندارىنىڭ كۇمىس جۇلدەگەرى نۇربەك ورالباي.
كوك تۋىمىزدى الەمگە تانىتقان قىز-جىگىتتەردىڭ ەڭبەگى ەرەن. ولار الداعى ۋاقىتتا دا ۇزدىكتەر قاتارىنان كورىنىپ، بيىك بەلەستەردى باعىندىرادى دەپ سەنەمىز.