قىسقى دەمالىستىڭ باستالۋىنا بايلانىستى پوليسەيلەر اتا-انالارعا ۇندەۋ جاسادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
قۇرمەتتى اتا-انالار!
قازىرگى ۋاقىتتا ەسىرتكى كەز كەلگەن وتباسىنىڭ ومىرىنە ەنۋى مۇمكىن. بيىل پوليسيا ەسىرتكى تاراتۋعا قاتىسى بار 40-تان استام كامەلەتكە تولماعان ءجاسوسپىرىمدى ۇستادى.
قىسقى دەمالىسقا بايلانىستى ىشكى ىستەر مينيسترلىگى اتا-انالاردى بالالارىنىڭ ومىرىنە بارىنشا ارالاسۋعا شاقىرادى، سەبەبى بالانىڭ ەسىرتكى يممۋنيتەتىن قالىپتاستىرۋدا وتباسىنىڭ ءرولى ەڭ ماڭىزدى.
سىزدەر بالالارىڭىزدىڭ ورتاسىن بىلۋلەرىڭىز كەرەك، ولار پايدالاناتىن ينتەرنەت-رەسۋرستاردى قاداعالاعاندارىڭىز ابزال. ءجاسوسپىرىمنىڭ زاتتارىنىڭ اراسىندا كەز كەلگەن دارى-دارمەك قاپتامالارى، فولگا، شىنى تۇتىكتەرى، تامشۋىرلار كەزدەسسە، مۇقيات بولىڭىز. مۇنىڭ ءبارى سينتەتيكالىق ەسىرتكىنى قولدانۋعا ارنالعان قۇرال بولا الادى.
اقشا شىعىنىنا نەمەسە كەرىسىنشە ونىڭ كوبەيۋىنە نازار اۋدارىڭىز. سەبەبى ەسىرتكىنى قولدانۋدان باسقا بالا تەز ارادا كوپ تابىس تابۋ مۇمكىندىگىنە قىزىعىپ، ونى تاراتۋعا قاتىسۋى مۇمكىن، – دەدى ق ر ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى باقىتجان ءامىرحانوۆ.
ەگەر ءسىزدىڭ بالاڭىزدا:
- ارالاساتىن ورتاسى وزگەرسە؛
- دوستارىمەن سويلەسۋ نەمەسە حات الماسۋ كەزىندە جاڭا تۇسىنىكسىز سوزدەر پايدا بولسا؛
- تەلەفوندا، مەسسەندجەرلەردە گەولوكاسيالارى بار بەلگىلەر، فوتوسۋرەتتەر پايدا بولسا؛
- تەلەفون نومىرلەرى، ينتەرنەت-سايتقا سىلتەمەلەرى بار جازبالار نەمەسە ساندار جيىنتىعى بولسا؛
بەلگىسىز زاتتارى بار ءتۇرلى-تۇستى وراما بولسا، ءسىز كۇدىكتەنۋگە ءتيىسسىز.
ەستەرىڭىزگە سالا كەتەيىك، ەسىرتكى قىلمىسى ءۇشىن قىلمىستىق جاۋاپكەرشىلىك 16 جاستان، ەسىرتكىنى ساتقانى ءۇشىن 14 جاستان باستالادى.