VIII شاقىرىلعان الماتى ءماسليحاتىنىڭ كەزەكتى سەسسياسى بارىسىندا دەپۋتاتتاردىڭ قاراۋىنا قالانىڭ ديزاين-كودىنىڭ جوباسى ۇسىنىلدى.
الماتى اكىمىنىڭ ورىنباسارى اسقار ءامرين ءوزىنىڭ سوزىندە مەملەكەت باسشىسىنىڭ 2022 جىلعى قاراشادا جانە اعىمداعى جىلعى تامىزدا بەرگەن تاپسىرمالارىن ورىنداۋ اياسىندا جاقسى ناتيجەلەرگە قولجەتكىزىلگەنىن اتاپ ءوتتى.
«ءسىز بەن ءبىز الماتىنىڭ 2040 جىلعا دەيىنگى جاڭا باس جوسپارىن، الماتى اگلومەراسياسىن دامىتۋدىڭ كەشەندى جوسپارىن جەدەل قاراپ، قابىلدادىق، كوممۋنالدىق قىزمەتتەرگە تاريفتەردىڭ ءوسۋىن وتەۋ ءۇشىن ءحاوت ساناتىنداعى ازاماتتارعا تولەمدەردى بەكىتتىك، الداعى ءۇش جىلدىق كەزەڭگە ارنالعان قالانىڭ الەۋمەتتىك باعدارلانعان بيۋدجەتىن قابىلدادىق»، – دەدى اسقار ءامرين.
ونىڭ ايتۋىنشا، الماتىنىڭ ديزاين-كودى - بۇل ءومىر سۇرۋگە قولايلى ۇيلەسىمدى مەگاپوليس قۇرۋ ءۇشىن قالالىق ورتانى قالىپتاستىرۋ جونىندەگى ەرەجەلەر مەن قاعيداتتاردىڭ جيىنتىعى.
«ءبىزدىڭ الدىمىزدا ەكى مىندەت تۇر – الماتىنىڭ تانىمال تاريحي كەلبەتىن ساقتاۋ جانە الەمدىك تەندەنسيالاردى ەسكەرە وتىرىپ، مەگاپوليستىڭ بولاشاق بەينەسىن دامىتۋ»، – دەدى الماتى اكىمىنىڭ ورىنباسارى اسقار ءامرين.
بۇل قۇجات وسى ماقساتتارعا قولجەتكىزۋگە ىقپال ەتۋگە ارنالعان. ديزاين-كود كەزەڭ-كەزەڭىمەن ەنگىزىلەتىن بولادى. جاڭا نىساندار ءۇشىن ۇسىنىستار مەن تالاپتاردىڭ تولىق كولەمى قولدانىلادى.