قازاق حالقىنىڭ سان عاسىرلىق ارمانى بولعان قاسيەتتى تاۋەلسىزدىگىمىزگە قاتەر توندىرگەن قاڭتار وقيعاسىنا جۋىردا ءبىر جىل بولادى.
سول ءبىر قاسىرەتتى كۇندەر قازاقستان پوليسياسىنىڭ دا كۇش-جىگەرىن سىنعا سالعان كۇندەر بولدى.
ەل تىنىشتىعى ءۇشىن ساپتا تۇرعان ءتارتىپ ساقشىلارى سىن ساعاتتا انتتارىنا ادالدىق تانىتىپ، وتانعا دەگەن سۇيىسپەنشىلىگىن وزدەرىنىڭ باتىل دا ەرجۇرەك ىس-ارەكەتتەرىمەن دالەلدەي ءبىلدى.
ەلىمىز تاۋەلسىزدىك العان 30 جىلدىڭ ىشىندە 800-دەن استام پوليسيا قىزمەتكەرى قىزمەت بابىندا جانە قىلمىسكەرلەردىڭ قولىنان قازا تاپسا، قاڭتار وقيعاسى وسى ءبىر قارالى ساندى تاعى دا ەسەلەي ءتۇستى.
الماتى قالاسىندا «تاعزىم» مەموريالىنىڭ اشىلۋى ءبىزدىڭ ەل باسىنا كۇن تۋعان اۋىر كۇندەردە قازا تاپقان ارىپتەستەرىمىزگە دەگەن ۇلكەن قۇرمەت دەپ بىلەمىز. مەموريالدىڭ اشىلۋ سالتاناتىندا مەملەكەت باسشىسى قاسىم-جومارت توقايەۆ: «قاڭتار قاسىرەتى مەن سول كەزدە ءومىرى قيىلعان ازاماتتار جادىمىزدا ماڭگى ساقتالادى»، - دەگەن بولاتىن. ءيا، قاڭتار وقيعاسى كەزىندە قۇقىق قورعاۋ ورگاندارىنىڭ 3 مىڭنان استام قىزمەتكەرى جارالانىپ، 19 ادام قازا تاپتى. قانشاما ارىپتەسىمىز مۇگەدەك بولىپ قالدى.
وسى اۋىر كۇندەردە الماتى اكادەمياسىنىڭ جەكە قۇرامى دا ەل قاۋىپسىزدىگى ءۇشىن ساپقا تۇردى. قاڭتار وقيعاسى كەزىندە باتىلدىق تانىتىپ، بەيبىت تۇرعىنداردى قورعاعان تاكتيكا-ارناۋلى دايارلىق كافەدراسىنىڭ باستىعى، پوليسيا پولكوۆنيگى ولەگ رومانوۆيچ سوي مەملەكەت باسشىسىنىڭ قولىنان «ەرلىگى ءۇشىن» مەدالىن الدى.
«تاعزىم» مەموريالى - ءجاي ەسكەرتكىش قانا ەمەس، ول، مەملەكەت باسشىسى ايتقانداي، تۇراقتىلىق پەن تاتۋلىق بولسا عانا ەلىمىزدىڭ اماندىعىن، جەرىمىزدىڭ بۇتىندىگىن قورعاي الاتىنىمىزدى دالەلدەيتىن مەموريال.