بۇگىنگى تاڭدا ەسىمدەرى بەلگىلى قازاقستاندىق سولداتتاردىڭ جالپى سانى – 74.
ءسىم باسپا ءسوز قىزمەتىنىڭ اقپاراتىنا سايكەس، قازاقستاننىڭ وسلوداعى ەلشىلىگى ەكىنشى دۇنيەجۇزىلىك سوعىس كەزىندە وككۋپاسيادا بولعان نورۆەگيادا تۇتقىندا قازا تاپقان قازاقستاندىق جاۋىنگەرلەردىڭ جاڭارتىلعان ءتىزىمىن جاريالادى، دەپ حابارلايدى Almaty-akshamy.kz
سوڭعى ايلاردا 18 قازاقستاندىق ساربازدىڭ ءاتى-جونى مەن جەرلەنگەن جەرى انىقتالعان. بۇگىنگى تاڭدا ەسىمدەرى بەلگىلى قازاقستاندىق سولداتتاردىڭ جالپى سانى – 74. ساربازدار الماتى قالاسى، اقمولا، اقتوبە، الماتى، جامبىل، قىزىلوردا، سولتۇستىك قازاقستان، تۇركىستان جانە شىعىس قازاقستان وبلىستارىنىڭ تۋمالارى نەمەسە سول وڭىرلەردەن اسكەرگە شاقىرىلعان. جاۋىنگەرلەردىڭ بەيىتتەرى ساننەشوەن (Tjøtta sovjetiske krigskirkegård)، ليللەحاممەر (Jørstadmoen)، بەرگەن (Åsane kirkegård) جانە ترونحەيم (Støren kirkegård) قالالارىنىڭ جانىنداعى كەڭەستىك اسكەري زيراتتاردا.
«تىزىمدە ساربازدىڭ تۋعان جىلى مەن مەكەنى، اسكەرگە شاقىرۋ، قىزمەت ەتۋ، تۇتقىندالۋى، قايتىس بولعان كەزى جانە جەرلەنگەن جەرى، تۋىستارى تۋرالى مالىمەتتەر، سونداي-اق قولدا بار قۇجاتتارعا سىلتەمەلەر بەرىلگەن. ءتىزىم «فالستاد ورتالىعى» (نورۆەگيا)، قازاقستان اۋماعىنان شاقىرىلىپ ۇلى وتان سوعىسى كەزىندە قازا تاپقان نەمەسە حابارسىز كەتكەن اسكەري قىزمەتشىلەر تۋرالى «مەموريال» دەرەكتەر بانكى، سونداي-اق رەسەيلىك «مەموريال» جيىنتىق دەرەكتەر بانكى سياقتى بىرنەشە دەرەكتەر كوزدەرىنەن الىنعان اقپاراتتى سالىستىرۋ ارقىلى جاسالدى»، - دەپ جازىلعان حابارلامادا.
بۇگىنگى كۇنگە دەيىن نورۆەگيادا جەرلەنگەن كەڭەستىك اسكەريلەردىڭ شامامەن 15 500 سانى تۋرالى بەلگىلى بولىپ، ولاردىڭ 7000-عا جۋىعىنىڭ ەسىمدەرى انىقتالعان. 1941-1945 جىلدارى نورۆەگيادا جەرلەنگەن قازاقستاندىق جاۋىنگەرلەردىڭ ءتىزىمىن (2022 جىلعى ساۋىردەگى جاعداي بويىنشا) ەلشىلىكتىڭ سايتىنان بىلۋگە بولادى.