بۇل كينوزەرتحانا 19-23 قىركۇيەك ارالىعىندا ىنتىماقتاستىق پەن بىرلەسكەن وندىرىسكە اشىق جاس رەجيسسەرلەر مەن پروديۋسەرلەرگە ارنالعان
«پارازيت» ءفيلمىنىڭ رەجيسسەرلەرى الماتىداعى قازاقستاندىق رەجيسسەرلەر مەن پروديۋسەرلەردى وقىتادى، دەپ حابارلايدى Almaty-akshamy.kz.
ەرتەڭ Cinema Press كلۋبىندا كورەيا كينو ونەرى اكادەمياسىنىڭ (KAFA) وكىلدەرىمەن باسپا ءسوز ءماسليحاتى وتەدى. كورەياداعى وسى جەتەكشى كينو مەكتەبىنىڭ تۇلەكتەرى اراسىندا وسكار سىيلىعىن العان «پارازيت» ءفيلمىنىڭ رەجيسسەرى بونگ دجۋن حو مەن تانىمال «كالمارلار ويىنى» سەريالىنىڭ وپەراتورى لي ءحون دەوك بار.
كورەيا كينو ونەرى اكادەمياسى الماتىعا KAFA Kino Lab فورماتىنداعى ينتەنسيۆتى ءبىلىم بەرۋدى اكەلدى. بۇل كينوزەرتحانا 19-23 قىركۇيەك ارالىعىندا ىنتىماقتاستىق پەن بىرلەسكەن وندىرىسكە اشىق جاس رەجيسسەرلەر مەن پروديۋسەرلەرگە ارنالعان.
قازاقستان پاندەميادان كەيىن KAFA Kino-lab ءۇشىن ءبىرىنشى ەل بولدى. بۇعان دەيىن كورەي كينواكادەمياسىنىڭ اقش، جاپونيا، فرانسيا جانە قىتايداعى كينومەكتەپتەرمەن وسىنداي بىرلەسكەن جوبالارى بولعان. ءبىزدىڭ ەلىمىزدە AlmaU مەديا جانە كينو مەكتەبى كينوزەرتحانا وتكىزۋدە KAFA سەرىكتەسى بولدى.
«الماتىدا KAFA Kino Lab بىرلەسىپ ۇيىمداستىرۋ – ءبىز ءۇشىن ستراتەگيالىق ماڭىزدى كەزەڭ. قازاقستاندىق ستۋدەنتتەردى حالىقارالىق دامۋ، الەمدىك كينويندۋستريا كوشباسشىلارىمەن سەرىكتەستىك، گرانتتىق باعدارلامالار مۇمكىندىكتەرى جانە ءوزارا ارەكەتتەسۋدىڭ باسقا تۇرلەرى ارقىلى وقىتۋ ولاردىڭ بولاشاق داعدىلارىن مەڭگەرۋىنە جاعداي جاسايدى»، - دەپ اتاپ ءوتتى AlmaU مەديا جانە كينو مەكتەبى.
الماتىداعى KAFA Kino Lab قازاقستان رەسپۋبليكاسى مەن وڭتۇستىك كورەيا اراسىنداعى ديپلوماتيالىق قارىم-قاتىناستىڭ 30 جىلدىعىنا ارنالعان. جوبا قازاق-كورەي فيلمدەرى مەن سەريالدارىن بىرلەسىپ شىعارۋعا باستاماشى بولا الاتىنىمەن ەرەكشەلەنەدى.
بەس كۇن بويى KAFA پروفەسسورلارى AlmaU مەديا جانە كينو مەكتەبىنىڭ ارىپتەستەرىمەن بىرگە ارنايى بايقاۋ ناتيجەسىندە ىرىكتەلىپ الىنعان 12 ادامدى – التاۋى قازاقستاننان جانە التاۋى وڭتۇستىك كورەيادان وقىتىلادى. ماسەلەن، قاتىسۋشىلاردىڭ اراسىندا وتكەن جىلى پۋسان قالاسىندا وتكەن 26-شى حالىقارالىق كينوفەستيۆالگە «وت» فيلمىمەن شاقىرىلعان رەجيسسەر ايجان قاسىمبەك تە بولدى.
KAFA Kino Lab ناتيجەلەرى بويىنشا قاتىسۋشىلار ءوز جوبالارىن ۇسىنادى. زەرتحانانىڭ نەگىزگى ماقساتى – الەمدىك كينو نارىعىنا نازار اۋدارا وتىرىپ، بىرلەسكەن وندىرىسكە قاتىسۋشىلاردى پيچينگكە ۇيرەتۋ.
ونىڭ وكىلدەرىمەن وتەتىن باسپا ءسوز ءماسليحاتى اياسىندا جۋرناليستەر وڭتۇستىك كورەيا مەن قازاقستان كينەماتوگرافيستەرىنىڭ ىنتىماقتاستىعى پەرسپەكتيۆالارى، كورەي فيلمدەرىنىڭ تانىمالدىلىعى فەنومەنى جانە جالپى كينويندۋسترياداعى ۇردىستەر تۋرالى بىلە الادى.