يەمەندە سەگىز جىلعا سوزىلعان سوعىس توقتادى

وق اتپاۋ كەلىسىمى 2 ايعا دەيىن كۇشىندە بولادى

رامازان ايىنىڭ قۇرمەتىنە ەل بيلىگى مەن ونىڭ جاقتاسى ساۋد ارابياسى باستاعان اراب كواليسياسى جانە قارسىلاس وپپوزيسيالىق حۋسيت توبى بەيبىت بىتىمگە كەلدى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ. 

وق اتپاۋ كەلىسىمى 2 ايعا دەيىن كۇشىندە بولادى. بۇل ۇسىنىستى باسىندا بىرىككەن ۇلتتار ۇيىمىنىڭ باس حاتشىسى انتونيۋ گۋتەرريش جاساعان بولاتىن. ءبىتىم اياسىندا حۋسيتتەردىڭ باقىلاۋىنداعى ايماقتارعا 18 جۇك كولىگى جانارماي جەتكىزىپ تۇرادى. سونداي-اق ەل استاناسى سانا اۋەجايىنان مىسىر مەن يوردانياعا اۋە رەيستەرى اشىلادى. ساراپشىلاردىڭ ايتۋىنشا، يەمەن ەكونوميكاسى، ونىڭ ىشىندە دەنساۋلىق ساقتاۋ سالاسى تولىق كۇيرەگەن. حالىقتىڭ 80 پروسەنتى اش-جالاڭاش. 

«قارسىلاس تاراپتار قۇرلىق، تەڭىز جانە اۋە اسكەري وپەراسيالارىن توقتاتۋعا ۋاعدالاستى. بۇل بەيبىت ءبىتىم - يەمەندەگى ۇزاققا سوزىلعان سوعىستى ءبىرجولا توقتاتۋعا جاسالعان العاشقى قادام. قاقتىعىستى بەيبىت رەتتەۋ بويىنشا كەلىسسوزدەردى جاڭعىرتۋعا جانە ساياسي ۇدەرىستى قايتا باستاۋعا قولايلى ءسات تۋىپ تۇر»،-دەيدى بۇۇ باس حاتشىسى انتونيۋ گۋتەرريش.