2024 جىلعى ازيا چەمپيوناتىنداعى تورەشىلىككە قاتىستى داۋلى جاعدايلاردى تەرگەۋگە رەسمي تۇردە كىرىستى، دەپ حابارلايدى aqshamnews.kz
28 قاراشا مەن 11 جەلتوقسان ارالىعىندا تايلاندتىڭ چيانگماي قالاسىندا وتكەن بۇل جارىس بارىسىندا تورەشىلىككە قاتىستى شاعىمدار ايتىلىپ، جارىستىڭ ادىلدىگىنە قاتىستى ەلەۋلى كۇماندەر تۋىندادى.
Inside the Games مالىمەتى بويىنشا، ايىپتاۋلار وزبەك بوكسشىلارىنا جاسالعان شەشىمدەرگە بايلانىستى، بۇل جاعدايدى IBA ءقازىر مۇقيات زەرتتەۋدى باستاعان.
ءبىرىنشىسى – ابىلايحان ءجۇسىپوۆ پەن وزبەك حاۆاسبەك اسادۋللايەۆ اراسىنداعى جەكپە-جەك بولدى. جۇدىرىقتاسۋ كەزىندە قارسىلاسى وتانداسىمىزدى تىستەپ العان ەدى. ول ساتتە تورەشىلەر ەلەمەگەن بولاتىن.
كەيىننەن قازاقستان بوكس فەدەراسياسىنىڭ شاعىمىنان كەيىن تەحنيكالىق دەلەگات سەيدي داففي ءىستى قايتا قاراپ، اسادۋللايەۆتى ەرەجەنى بۇزعانى ءۇشىن جارىستان شەتتەتىپ، التىن مەدال وتانداسىمىزعا بەرىلدى. ەكىنشى كۇماندى جەكپە-جەك تاي بوكسشىسى سومچاي ۆونگسۋان مەن وزبەك ادحامدجون مۋحيددينوۆ اراسىندا ءوتتى.
مۇندا دا وزبەك بوكسشىسى كۇماندى جەڭىسكە جەتكەن. ءۇشىنشىسى – سانجار تاشكەنباي مەن وزبەك شوديارجون مەليكۋزييەۆ اراسىنداعى جەكپە-جەكتى دە قايتا قارايدى. قازاقستان بوكس فەدەراسياسى سوڭعى راۋندتا تاشكەنبايعا قارسى تورەشىنىڭ نەگىزسىز ەسەپ جۇرگىزۋى جەكپە-جەكتىڭ ناتيجەسىنە اسەر ەتىپ، جەڭىستى مەليكۋزييەۆكە بەرگەنىن مالىمدەدى.