HR Enbek ەڭبەك رەسۋرستارى پورتالىندا پىكىرلەردى ورنالاستىرۋ بويىنشا جاڭا فۋنكسيونال پايدا بولدى.
وندا جۇمىسكەرلەر – قازىرگى جانە بۇرىنعى جۇمىس ورىندارى تۋرالى، ال جۇمىس بەرۋشىلەر – جۇمىس جاسايتىن جانە جۇمىستان شىققان جۇمىسكەرلەرى تۋرالى پىكىر قالدىرا الادى، دەپ حابارلايدى aqshamnews.kz.
پىكىرلەر بەس جۇلدىزدى باعالاۋ (وتە ناشاردان وتە جاقسىعا دەيىن) مەن ماتىندىك سيپاتتامانى قامتيدى. فۋنكسيونالدىلىق جۇمىسكەر مەن جۇمىس بەرۋشىنىڭ ءوزارا ارەكەتتەسۋىنىڭ وڭ نەمەسە تەرىس تاجىريبەسىن باعالاۋعا مۇمكىندىك بەرەدى، ءبىراق بۇل مىندەتتى ەمەس.
پىكىر قالدىرىپ، ونىڭ ءتۇپنۇسقالىعىنا كەپىلدىك بەرۋ ءۇشىن وعان ەلەكتروندىق سيفرلىق قولتاڭبا ارقىلى قول قويۋ كەرەك. ءسىز ءوزىڭىزدىڭ جازبالارىڭىزدى «مەنىڭ پىكىرلەرىم» (پايدالانۋشى قالدىرعان) جانە «مەن تۋرالى پىكىرلەر» (پايدالانۋشى العان) سالىمدارىنداعى ءتيىستى بولىمدە كورە الاسىز. جاسالعان جانە الىنعان پىكىرلەر تۋرالى بارلىق دەرەكتەردى قۇجات فورماتىندا جۇكتەۋگە بولادى.
سونداي-اق، قىزمەتكەر مەن جۇمىس بەرۋشى ءبىر پىكىر قالدىرا الادى، بۇل ىنتىماقتاستىق تۋرالى اقپاراتتى تولىقتىرۋعا نەمەسە ناقتىلاۋعا مۇمكىندىك بەرەدى.
قازىرگى ۋاقىتتا جۇمىس بەرۋشىلەر جۇمىسقا ورنالاسۋعا ۇمىتكەرلەردى ىرىكتەۋ كەزىندە «جۇمىسكەرلەر» بولىمىندە ولار بويىنشا بۇرىنعى جۇمىس ورىندارىنان كەرى بايلانىس سۇراي الادى. بۇل رەتتە كانديداتقا 1414 نومىرىنەن SMS ارقىلى نەمەسە پورتالداعى جەكە كابينەتكە، سونداي-اق HR Enbek موبيلدىك قوسىمشاسىندا كەلىسۋگە سۇراۋ سالۋ جىبەرىلەدى. جۇمىس بەرۋشى اقپاراتقا كەلىسىم العاننان كەيىن عانا قول جەتكىزە الادى.
Enbek.kz ەلەكتروندىق ەڭبەك بيرجاسىنىڭ پورتالىندا جۇمىس بەرۋشىلەر تۋرالى پىكىرلەردى كورۋ مۇمكىندىگى بارلىق ىزدەنۋشىلەر ءۇشىن 2025 جىلى قولجەتىمدى بولادى.
بۇل فۋنكسيونال جۇمىس بەرۋشىلەر مەن جۇمىسكەرلەر اراسىنداعى قارىم-قاتىناستاردىڭ اشىقتىعىن ارتتىرۋعا، جۇمىس ىزدەۋ جانە قىزمەتكەرلەردى جۇمىسقا الۋ پروسەسىن جەڭىلدەتۋگە باعىتتالعان.
پايدالانۋشى بەرىلگەن اقپارات ءۇشىن تولىق جاۋاپ بەرەتىنىن ەسكەرۋ ماڭىزدى. وسى ونلاين-پلاتفورمالاردا دايەكسىز اقپارات قالدىرعان جاعدايدا زاڭدىق تۇرعىدان جاۋاپكەرشىلىك قاراستىرىلعان. جالعان اقپاراتتى تاراتۋ اكىمشىلىك جاۋاپكەرشىلىككە اكەپ سوعادى.