2026 جىلعا ارنالعان ەڭ تومەنگى جالاقى مولشەرى بۇرىنعى دەڭگەيدە بەكىتىلگەندىكتەن، نەگىزگى ساناتتار بويىنشا مامس-كە تولەنەتىن جارنالاردىڭ مولشەرى ساقتالادى. الايدا زاڭعا ەنگىزىلگەن تۇزەتۋلەرگە بايلانىستى وزگەرىستەر بار. بۇل تۋرالى الەۋمەتتىك مەديسينالىق ساقتاندىرۋ قورىندا ءتۇسىندىردى.
جارنا ءوسىمى – تەك مەملەكەتتىك تولەمدەرگە قاتىستى
2025 جىلعى شىلدە ايىندا مەملەكەت باسشىسى ءمامس جانە مەديسينالىق قىزمەتتەر كورسەتۋ سۇراقتارى بويىنشا وزگەرىستەر مەن تولىقتىرۋلار ەنگىزۋ تۋرالى زاڭعا قول قويدى. ونىڭ ءبىر بولىگى دەنساۋلىق ساقتاۋ جۇيەسىنىڭ قارجىلىق تۇراقتىلىعىن قامتاماسىز ەتۋگە باعىتتالعان – مەملەكەت، جۇمىس بەرۋشىلەر جانە ازاماتتاردىڭ ورتاق ىنىماقتاستىق جاۋاپكەرشىلىگىن ارتتىرۋ ارقىلى.
وسى ماقساتتا الەۋمەتتىك وسال ساناتتاعى حالىق ءۇشىن (ولاردىڭ سانى 11 ميلليوننان اسادى) مەملەكەت تولەيتىن جارنالاردى كەزەڭ-كەزەڭىمەن ارتتىرۋ كوزدەلگەن: 2027 جىلى – 2،2%-دان باستاپ، 2037 جىلعا قاراي – 4،7%-عا دەيىن. قازىرگى ۋاقىتتا مەملەكەت جارنالارىنىڭ مولشەرلەمەسى ەسەپتەۋ وبەكتىسىنىڭ 2%-ىن قۇرايدى جانە بۇل مولشەرلەمە 2026 جىلى دا ساقتالادى.
ايتا كەتەرلىگى، بۇل وزگەرىس جەڭىلدىك ساناتىنداعى ازاماتتاردىڭ وزدەرىنە ەش اسەر ەتپەيدى. ولار بۇرىنعىداي اۆتوماتتى تۇردە ساقتاندىرىلعان بولىپ قالا بەرەدى، سەبەبى جارنالاردى مەملەكەت تولەيدى.
جوعارعى شەكتىڭ وزگەرۋى نەنى بىلدىرەدى؟
دەنساۋلىق ساقتاۋ جۇيەسىنىڭ تۇراقتىلىعىن قامتاماسىز ەتۋ ماقساتىندا 2026 جىلعى 1 قاڭتاردان باستاپ قىزمەتكەرلەردىڭ جارنالارى مەن جۇمىس بەرۋشىلەردىڭ اۋدارىمدارىن ەسەپتەۋ ءۇشىن قولدانىلاتىن تابىستىڭ جوعارعى شەگىن ارتتىرۋ ەنگىزىلدى. ال پايىزدىق مولشەرلەمەلەر وزگەرىسسىز قالادى.
ءقازىر اۋدارىمداردىڭ ەڭ جوعارى مولشەرى 25 500 تەڭگەنى قۇرايدى (10 ەڭ تومەنگى جالاقى مولشەرىندەگى شەكتى تابىستىڭ 3%). 2025 جىلى جارنانىڭ ەڭ جوعارى مولشەرى – 17 000 تەڭگە (10 ەتج-نىڭ 2%-ى).
ەندى جۇمىس بەرۋشىلەر جارنالاردى 40 ەتج-دان اسپايتىن تابىستان، ال قىزمەتكەرلەر 20 ەتج-عا دەيىنگى تابىستان تولەيتىن بولادى (باستاپقىدا ەكى تولەم بويىنشا دا شەكتى 50 اەك-كە دەيىن ارتتىرۋ ۇسىنىلعان، الايدا زاڭ جوباسىن تالقىلاۋ بارىسىندا ولار تومەندەتىلدى).
دەمەك، بۇعان دەيىن ايلىق تابىسى 850 مىڭ تەڭگەدەن اساتىن قىزمەتكەرلەر (1–2 ملن تەڭگە جانە ودان جوعارى تابىس الاتىندار) 17 000 تەڭگەدەن ارتىق جارنا تولەمەيتىن. سەبەبى ەسەپتەۋ بازاسىنا شەكتەۋ قولدانىلاتىن. بۇل بەلگىلەنگەن مولشەرلەمەگە پروپورسيونالدى تۇردە از بولىپ، ايلىعى 850 مىڭ تەڭگەدەن تومەن جانە جالاقىسىنىڭ ءدال 2%-ىن تولەيتىن قىزمەتكەرلەرگە قاتىستى ادىلەتسىز ەدى.
وزگەرىستەردەن كەيىن قىزمەتكەردىڭ ەڭ جوعارى جارناسى – 34 000 تەڭگە (1،7 ملن تەڭگەنىڭ، ياعني 20 ەتج-نىڭ 2%-ى)، جۇمىس بەرۋشىنىڭ ەڭ جوعارى اۋدارىمى – 102 000 تەڭگە (3،4 ملن تەڭگەنىڭ، ياعني 40 ەتج-نىڭ 3%-ى) بولادى.
ايتا كەتەيىك، بۇل وزگەرىس اي سايىنعى تابىسى 850 مىڭ تەڭگەدەن اساتىن جالدامالى قىزمەتكەرلەردىڭ نەبارى 9%-ىنا عانا اسەر ەتەدى. ال ايلىعى 3،4 ملن تەڭگەدەن اساتىن قىزمەتكەرلەر سانى – بار بولعانى 20 مىڭ ادام (0،3%). قالعان 91% جۇمىس ىستەيتىن ازاماتتار ءۇشىن ەشتەڭە وزگەرمەيدى.
قالعان تولەۋشىلەر ءۇشىن جارنا مولشەرلەمەلەرى
ءبىرىڭعاي تولەم تولەۋشىلەر
ءبىرىڭعاي تولەمدى جەكە كاسىپكەرلەر مەن زاڭدى تۇلعالار ءوز قىزمەتكەرلەرى ءۇشىن تولەيدى. ول جەكە تابىس سالىعىن، جۇمىس بەرۋشى مەن قىزمەتكەردىڭ مىندەتتى زەينەتاقى جارنالارىن، الەۋمەتتىك اۋدارىمداردى، سونداي-اق ءمامس بويىنشا جارنالار مەن اۋدارىمداردى قامتيدى.
2026 جىلعى 1 قاڭتاردان باستاپ ءبىرىڭعاي تولەم مولشەرى ەسەپتەلگەن تابىستىڭ 24،8%-ىن قۇرايدى.
جەكە كاسىپكەرلەر، شارۋا قوجالىقتارىنىڭ يەلەرى جانە جەكە پراكتيكامەن اينالىساتىن تۇلعالار
بۇل ساناتتار مامس-كە 1،4 ەتج-نىڭ 5%-ى مولشەرىندە جارنا تولەيدى.
2026 جىلى ەڭ تومەنگى جالاقى مولشەرى وزگەرمەگەندىكتەن، ءمامس جارناسى دا بۇرىنعىداي – ايىنا 5 950 تەڭگە بولىپ قالادى. بۇل تابىس دەڭگەيىنە قاراماستان تولەنەتىن تۇراقتى جارنا.
ايتا كەتەيىك، ەگەر جەكە كاسىپكەر ءبىر مەزگىلدە باسقا ۇيىمنىڭ جالدامالى قىزمەتكەرى بولىپ، ول ءۇشىن ءمامس تولەمدەرى اۋدارىلىپ تۇرسا دا، جەكە كاسىپكەر رەتىندە ءوزى ءۇشىن جارنا تولەۋدەن بوساتىلمايدى. تەك قىزمەتىن رەسمي تۇردە توقتاتقان نەمەسە ارەكەتسىز دەپ تانىلعان جەكە كاسىپكەرلەر عانا جارنا تولەۋدى توقتاتادى.
دەربەس تولەۋشىلەر
دەربەس تولەۋشىلەر ساناتىنا تۇراقتى جۇمىسى جوق جانە جەڭىلدىك ساناتتارىنا كىرمەيتىن ازاماتتار جاتادى.
2026 جىلى ولار ءۇشىن ءمامس بويىنشا اي سايىنعى جارنا مولشەرى 1 ەتج-نىڭ 5%-ى، ياعني 4 250 تەڭگە.
ساقتاندىرىلعان مارتەبەسىن الۋ ءۇشىن ولاردىڭ وتكەن نەمەسە الداعى 12 اي قاتارىنان تولەمدەرى بولۋى ءتيىس. جارنالاردى ءار ايعا جەكە-جەكە تولەۋ قاجەت.