الماتى قالاسىندا 2026 جىلدان باستاپ بۇرىن ساقتاندىرىلماعان 60 مىڭنان استام تۇرعىن جەرگىلىكتى بيۋدجەت ەسەبىنەن مىندەتتى الەۋمەتتىك مەديسينالىق ساقتاندىرۋ (ءمامس) جۇيەسىنە قوسىلادى. وڭىرلىك كوممۋنيكاسيالار قىزمەتىندە «الەۋمەتتىك مەديسينالىق ساقتاندىرۋ قورى» كەاق الماتى قالالىق فيليالىنىڭ ديرەكتورى مۇحامەدجان ءىلياس وسىلاي دەپ مالىمدەدى.
ونىڭ ايتۋىنشا، ءقازىر الماتىدا شامامەن 2،3 ملن ادام تۇرسا، ولاردىڭ 1،9 ميلليونى (82%) ساقتاندىرىلعان مارتەبەگە يە ەكەن. قالا تۇرعىندارىنىڭ شامامەن 444 مىڭى ءقازىر وسى ءمامس جۇيەسىنەن تىس قالعان.
«ساقتاندىرىلماعانداردىڭ قاتارىندا D مەن ە ساناتىنا جاتاتىن، ياعني جاعدايى قيىن جانە شۇعىل دەڭگەيدەگى ازاماتتار بار. بۇلار ومىردە قيىندىققا تاپ بولعان شامامەن 95 مىڭ قالا تۇرعىنى. ولاردىڭ تابىسى جوق، بولسا دا وتە تومەن، كۇنكورىسىنە جەتپەيدى، سوندىقتان ولار مەملەكەتتىڭ قولداۋىنا قاتتى مۇقتاج»، – دەيدى ول.
2026 جىلى وسى ساناتتاعى مەديسينالىق كومەكتى تۇراقتى پايدالاناتىن 34 مىڭ ادام ءۇشىن ءمامس جارناسىن جەرگىلىكتى بيۋدجەتتەن تولەي باستاماق.
سونىمەن قاتار، رەسمي تۇردە تىركەلگەن 28 مىڭ جۇمىسسىز ازامات ءۇشىن دە جارنانى جەرگىلىكتى بيۋدجەتتىڭ ەسەبىنەن تولەيدى.
«ەسەپكە قاراعاندا، 2026 جىلى اتالعان ساناتتارداعى ادامدارعا جارنا تولەۋگە كەتەتىن شىعىن 6،9 ملرد تەڭگەدەن اسادى. ءبىر ادامعا اي سايىنعى جارنا – 9189 تەڭگە. بۇل رەتتە وسى ساناتتاعى بارلىق ازاماتتار اۆتوماتتى تۇردە ساقتاندىرىلىپ، جارنالار مەديسينالىق كومەككە ناقتى جۇگىنگەن ادامدارعا تولەنەتىن بولادى»، – دەپ اتاپ ءوتتى مۇحامەدجان ءىلياس.
كەلەر جىلعا قاڭتاردان باستاپ وسى ساناتتاعى تۇرعىندارعا ءمامس جۇيەسىندە دارىگەرلىك كومەك الۋعا قۇقىعىن راستايتىن SMS-حابارلاما كەلە باستايدى.