اقتاۋدا بىرنەشە اۋدان تۇرعىندارى اۋىز سۋسىز قالدى

اقتاۋ قالاسىندا قۇبىرداعى اپات سالدارىنان ءبىرقاتار شاعىناۋداندا اۋىز سۋ بەرۋ شەكتەلدى، دەپ حابارلايدى Aqshamnews.kz ءتىلشىسى.

«كاسپيي جىلۋ، سۋ ارناسى» مەملەكەتتىك كوممۋنالدىق كاسىپورنىنىڭ مالىمەتىنشە، قالانىڭ بىرنەشە اۋماعىندا اۋىز سۋ جارتىلاي توقتاتىلعان. سالدارىنان تۇرعىن ۇيلەر مەن الەۋمەتتىك نىساندار اۋىز سۋسىز قالعان.

اتاپ ايتقاندا، 27-شاعىناۋداندا №2، 44، 45، 53، 54، 57، 71، 72، 74، 75، 76 عيماراتتار زارداپ شەككەن.

16-شاعىناۋداندا “ايسار” تۇرعىن ءۇي كەشەنى، №18 عيمارات، “بەك” مەيرامحاناسى، بيزنەس ورتالىعى مەن مونشادا سۋ وشىرىلگەن.

3ۆ-شاعىناۋداندا ەنەرگەتيكالىق كوللەدج بەن وقۋ ورتالىعىندا اۋىز سۋ جوق.

سونداي-اق 4-شاعىناۋداندا №1، 2، 3، 20، 21، 67 ۇيلەر، №5 مەكتەپ جانە №67ا عيمارات سۋمەن قامتىلماي وتىر.

ال 1-دەن 8-گە دەيىنگى، سونداي-اق 14 جانە 15-شاعىناۋدانداردا اۋىز سۋ قىسىمى تومەندەتىلگەن.

كوممۋنالدىق كاسىپورىن وكىلدەرى جوندەۋ جۇمىستارى اياقتالعان سوڭ، سۋمەن جابدىقتاۋدى قالپىنا كەلتىرۋ ۋاقىتى قوسىمشا حابارلاناتىنىن مالىمدەدى.

ەسكە سالايىق، بۇعان دەيىن اۋىز سۋعا ارنالعان جەكە ەسەپتەگىش قۇرالى جوق قازاقستاندىقتاردىڭ سۋدى ەكى ەسە قىمبات تولەيتىنى تۋرالى جازىلعان بولاتىن.