الماتىدا تۇركسىب اۋدانىنىڭ ساۋلەتشىسى الماس مانياروۆ قالانىڭ باس جوسپارىنا ەنگىزىلىپ جاتقان وزگەرىستەر اياسىندا اۋداندى دامىتۋدىڭ نەگىزگى جوبالارى تۋرالى ايتتى، - دەپ حابارلايدى Aqshamnews.kz.
ونىڭ ايتۋىنشا، تۇركسىب اۋدانىندا ىسكەرلىك، الەۋمەتتىك جانە دەمالىس قىزمەتتەرىن بىرىكتىرەتىن جاڭا «شىعىس قاقپاسى» پوليورتالىعىن قۇرۋ كوزدەلگەن. بۇل پوليورتالىق مەگاپوليستىڭ ءوسۋ نۇكتەلەرىنىڭ بىرىنە اينالماق. سونىمەن قاتار، اۋداندا حالىقارالىق دەڭگەيدەگى سپورت ستاديونىن سالۋ جوسپارلانىپ وتىر.
«اۋدانىمىزدا «شىعىس قاقپاسى» پوليورتالىعىن دامىتۋ قاراستىرىلعان. بۇدان بولەك، حالىقارالىق دەڭگەيدەگى ستاديون سالۋ جوسپارلانىپ وتىر. ونىڭ ماڭىندا الەۋمەتتىك، مادەني جانە دەمالىس نىساندارى، سونداي-اق زاماناۋي تۇرعىن ءۇي كەشەندەرى بوي كوتەرەدى. ساۋلەتتىك ستيل قاتاڭ ساقتالىپ، تۇرعىن ۇيلەر جوعارى ستاندارتتارعا ساي بولادى»، — دەدى الماس مانياروۆ.
سونداي-اق، ول جوبا اياسىندا سەيفۋللين كوشەسىنەن باستاپ تەمىرجول ۆوكزالىنا دەيىنگى اۋماقتا ەسكى تۇرعىن ۇيلەردى جاڭارتۋ، مەكتەپتەر، بالاباقشالار مەن ەمحانالار سالۋ، سونداي-اق كوشە-جول جەلىسىن دامىتۋ كوزدەلگەنىن مالىمدەدى. اتاپ ايتقاندا، حمەلنيسكيي كوشەسىن قۇلجا تاس جولىنا دەيىن ۇزارتۋ جوسپارلانعان. رىسقۇلوۆ داڭعىلىنان اۋەجاي ماڭىنداعى كولگە دەيىنگى اۋماقتى كورىكتەندىرىپ، سەرۋەندەۋ ايماعى مەن قوعامدىق كەڭىستىك قۇرۋ دا جوسپارعا ەنگەن.
الماس مانياروۆتىڭ ايتۋىنشا، باس جوسپاردى تۇزەتۋ قالا ءۇشىن ماڭىزدى. بۇل الماتىنىڭ ورتالىق بولىگىن عانا ەمەس، تومەنگى اۋماقتارىن دا بىردەي دامىتۋعا، مەگاپوليستىڭ بارلىق بولىگىندە ءومىر سۇرۋگە جانە جۇمىس ىستەۋگە قولايلى جاعداي جاساۋعا مۇمكىندىك بەرەدى.