2025 جىلعى 11-20 جەلتوقسان ارالىعىندا الماتى قالاسى مۋزەيلەر بىرلەستىگىنىڭ 7 قىزمەتكەرى سەۋل جانە كەندجۋ قالالارىنىڭ (كورەيا رەسپۋبليكاسى) جەتەكشى مۋزەيلەرىندە كاسىبي بىلىكتىلىگىن ارتتىرىپ كەلدى.
قىزمەتكەرلەردىڭ كاسىبي بىلىكتىلىگىن ارتتىرۋ سەۋل قالاسى مۋزەيلەر بىرلەستىگى تاراپىنان تەگىن نەگىزدە جۇزەگە اسىرىلدى. بۇل حالىقارالىق ىنتىماقتاستىقتى نىعايتۋ باعىتىنداعى جۇيەلى جۇمىستىڭ ناتيجەسى.
وقۋ باعدارلاماسى مۋزەي قىزمەتىنىڭ نەگىزگى باعىتتارى، اتاپ ايتقاندا، ەكسپوناتتاردى ەسەپكە الۋ جانە ساقتالۋىن قامتاماسىز ەتۋ، ونىڭ ىشىندە قولايلى كليماتتىق جاعدايلاردى (تەمپەراتۋرا، ىلعالدىلىق، جارىق) باقىلاپ، رەتتەۋ، رەستاۆراسيا جانە كونسەرۆاسيا جۇمىستارىن جۇرگىزۋ، تاسىمالداۋ كەزىندە قاۋىپسىزدىك تالاپتارىن ساقتالۋىن قاداعالاۋ بويىنشا تەوريالىق جانە پراكتيكالىق ساباقتاردى قامتىدى.
تاعىلىمداما اياسىندا الماتى قالاسى مۋزەيلەر بىرلەستىگىنىڭ قىزمەتكەرلەرى سەۋل جانە كەندجۋ قالالارىنىڭ جەتەكشى مۋزەيلەرىنىڭ جۇمىس تاجىريبەسىمەن جان-جاقتى تانىستى. اتاپ ايتقاندا، كورەيانىڭ ۇلتتىق مۋزەيى، كورەيا ۇلتتىق فولكلور مۋزەيى، سەۋل قالاسى تاريحى مۋزەيى، سەۋل قولونەر ونەر مۋزەيى، سەدجون پاتشا مۋزەيى، ادميرال لي سۋنسين مۋزەيى، كورەيانىڭ ۇلتتىق ساراي مۋزەيى، كەندجۋ ۇلتتىق مۋزەيى، كەندجۋ ۇلتتىق پاركى، كەنبوككۋن سارايى، چحونگەچحون مۋزەيى، حانياندوسون بەكىنىس-قامالى مۋزەيى. سونداي-اق، يۋنەسكو-نىڭ الەمدىك مۇرالار تىزىمىنە ەنگەن اشىق اسپان استىنداعى كەندجۋ ارحەولوگيالىق كەشەنىنىڭ قىزمەتىمەن تانىسىپ، وزىق تاجىريبەلەرىن زەردەلەدى.
ايتا كەتەيىك، 2022 جىلى الماتى قالاسى مۋزەيلەر بىرلەستىگى مەن سەۋل قالاسى تاريحى مۋزەيى اراسىندا ىنتىماقتاستىق تۋرالى مەموراندۋمعا قول قويىلعان بولاتىن. وسى كەلىسىم اياسىندا 2022 جىلى سەۋل قالاسى تاريحى مۋزەيىندە الماتى مۋزەيىنىڭ «ۇلى دالا جاۋھارلارى» كورمەسى، ال 2024 جىلى الماتى قالاسىندا سەۋل قالاسى تاريحى مۋزەيىنىڭ «سەۋل عاجايىپتارى» كورمەسى ۇيىمداستىرىلدى.