قىسقى دەمالىس قارساڭىندا وقۋ-اعارتۋ مينيسترلىگى اتا-انالارعا ارنايى ۇندەۋ جاساپ، بالالاردىڭ قاۋىپسىزدىگىنە ەرەكشە ءمان بەرۋگە شاقىردى، دەپ حابارلايدى Aqshamnews.kz ءتىلشىسى.
مينيسترلىكتىڭ مالىمەتىنشە، جىل سايىن پيروتەحنيكادان ونداعان بالا زارداپ شەگەدى.
بۇل ساننىڭ ارتىندا بالانىڭ اۋىر جاراقاتى مەن الدىن الۋعا بولاتىن وكىنىشتى جاعدايلار جاتىر.
«وتشاشۋ مەن پەتاردا – ويىنشىق ەمەس! ولار – بالاعا ءقاۋىپ توندىرەتىن جارىلعىش زاتتار. قاۋىپسىزدىك ەرەجەلەرىن قاپەردە ۇستاڭىزدار»، – دەيدى وقۋ-اعارتۋ مينيسترلىگىنىڭ حابارلاماسىندا.
18 جاسقا تولماعاندارعا پيروتەحنيكا ساتۋعا قاتاڭ تىيىم سالىنادى.
«ەگەر بالاعا پەتاردا ساتىپ تۇرعانىن كورسەڭىز — بەي-جاي قاراماڭىز، بۇل — زاڭعا قايشى ارەكەت. بالالارعا وتشاشۋدى ءوز بەتىنشە جاعۋعا مۇلدە بولمايدى. ءتىپتى «زيانسىز» كورىنگەننىڭ ءوزىن دە تەك ەرەسەكتەر عانا جاعۋى ءتيىس. پيروتەحنيكانى ءۇي ىشىندە، بالكوندا جانە تۇرعىن ۇيلەردىڭ ماڭىندا اتۋعا نەمەسە قولدانۋعا بولمايدى.
بالالاردىڭ اماندىعى – ءسىزدىڭ قىراعىلىعىڭىزعا بايلانىستى»، – دەپ وقۋ-اعارتۋ مينيسترلىگى اتا-انالارعا ەسكەرتۋ جاسادى.