قالانىڭ ورتالىق الاڭدارى مەن ساياباقتاردان باستاپ شەتكى شاعىناۋداندارعا دەيىنگى بارلىق اۋماعى بەزەندىرىلىپ، جىلىلىققا، جايلىلىق پەن قىسقى سيقىرعا تولى ءبىرتۇتاس مەرەكەلىك ورتا قالىپتاستى.
اباي جانە استانا الاڭدارى، اربات، پانفيلوۆ كوشەسى، 28 گۆاردياشى-پانفيلوۆشىلار اتىنداعى ساياباق، «الماتى ارەنا» مەن «اتاكەنت» سىندى ءداستۇرلى جاڭا جىلدىق ورىندار رەتىندە مەرەكەلىك ءىس-شارالاردىڭ نەگىزگى ورتالىعىنا اينالدى. مۇندا جارمەڭكەلەر، كونسەرتتەر ۇيىمداستىرىلىپ، تۇرعىندار ءۇشىن وتباسىلىق سەرۋەندەرگە قولايلى جاعداي جاسالدى. بيىل مەرەكەلىك بەزەندىرۋ اۋقىمى كەڭەيىپ، ءاربىر تۇرعىنعا قۋانىش سىيلاۋ ماقساتىندا جاڭا بەزەندىرىلگەن قوعامدىق كەڭىستىكتەر پايدا بولدى.
بۇل يگى ىسكە قالالىق كاسىپكەرلىك نىساندارى دا قوماقتى ۇلەس قوستى. ساۋدا ورتالىقتارى، ءدامحانالار، مەيرامحانالار، قوناق ۇيلەر مەن كەڭسە عيماراتتارى قاسبەتى مەن ۆيتريناسىن ساندەپ، قالانىڭ جاڭا جىلدىق كوركىن ودان ءارى ايشىقتاي ءتۇستى.
قالالىق كەڭىستىكتىڭ كوركەمدىك مازمۇنىنا ەرەكشە ءمان بەرىلدى. الماتىنىڭ ءار تۇكپىرىندە ەرتەگى كەيىپكەرلەرىنىڭ جارىق مۇسىندەرى، 2026 جىلدىڭ نىشاندارىمەن كومكەرىلگەن ارت-نىساندار، قار ۇشقىنى، سىيلىق، بۇعى جانە جاڭا جىلدىق شار بەينەسىندەگى ساندىك كومپوزيسيالار بوي كوتەردى. بۇل كوركەم ينستاللياسيالار قالا تۇرعىندارى مەن قوناقتارى ءۇشىن سۇيىكتى فوتوسۋرەت ءتۇسىرۋ الاڭىنا اينالدى.
بيىلعى مەرەكەلىك بەزەندىرۋدە «تازا قازاقستان» تاقىرىبىنداعى شاعىن ساۋلەت نىساندارى ايرىقشا ورىن الدى. ولار جاڭا جىلدىق ءسان مەن ەكولوگيالىق يدەيانى ۇشتاستىرىپ، تابيعاتقا جاناشىرلىق تانىتۋ مەن ەكولوگيالىق جاۋاپكەرشىلىك مادەنيەتىن دارىپتەيدى.
