قازاقستاندا ەلەكتروندىق سيفرلىق قولتاڭبا (ەسق) كىلتتەرىن قايتا شىعارۋ ءتارتىبى كۇشەيتىلدى. ەندى بۇل پروسەسس كەزىندە ازاماتتىڭ جەكە باسىن مىندەتتى تۇردە قوسىمشا راستاۋ تالاپ ەتىلەدى، دەپ حابارلايدى Aqshamnews.kz ءتىلشىسى.
«ۇلتتىق اقپاراتتىق تەحنولوگيالار» اق مالىمەتىنشە، جاڭا تالاپ ازاماتتاردىڭ جەكە دەرەكتەرىن قورعاۋ جانە الاياقتىق ارەكەتتەردىڭ الدىن الۋ ماقساتىندا ەنگىزىلگەن. قوسىمشا قورعانىس تەتىگى رۇقساتسىز قول جەتكىزۋ ءقاۋپىن تومەندەتۋگە باعىتتالعان.
ەندى pki.gov.kz پورتالىنداعى جەكە كابينەت ارقىلى ەسق كىلتتەرىن قايتا شىعارۋ كەزىندە جۇيە پايدالانۋشىدان جەكە باسىن ەكى ءتاسىلدىڭ بىرىمەن راستاۋدى سۇرايدى. اتاپ ايتقاندا، ءبىر رەتتىك SMS-كود ءموبيلدى ازاماتتار بازاسىندا تىركەلگەن تەلەفون نومىرىنە جىبەرىلەدى نەمەسە eGov Mobile قوسىمشاسىندا كورسەتىلەتىن سيفرلىق كود ەنگىزىلۋى قاجەت. بۇل تەتىك ەسق كىلتتەرىن يەسىنىڭ سمارتفونىنا قول جەتكىزۋسىز زاڭسىز پايدالانۋدان قورعاۋعا مۇمكىندىك بەرەدى.
جاڭا تالاپتار ازىرگە شەتەلدىك ازاماتتارعا قولدانىلمايدى. سەبەبى ولاردىڭ تەلەفون نومىرلەرى كوپ جاعدايدا ءموبيلدى ازاماتتار بازاسىنا تىركەلمەگەن.
ايتا كەتەيىك، بۇعان دەيىن الاياقتار الداۋ جولىمەن پايدالانۋشىلاردىڭ جەكە كابينەتتەرىنە كىرىپ، ەسق كىلتتەرىن ءوز تاسىمالداعىشتارىنا قايتا شىعارۋ فاكتىلەرى تىركەلگەن بولاتىن. بۇدان بولەك، ءۇشىنشى تۇلعانىڭ ەسق-سىن پايدالانعان قازاقستاندىقتارعا ايىپپۇل سالىناتىنى تۋرالى دا حابارلانعان ەدى.