الماتى قالالىق كارديوحيرۋرگيا ورتالىعى تاريحىندا العاش رەت جۇرەك ترانسپلانتاسياسى جاسالدى، دەپ حابارلايدى Aqshamnews.kz ءتىلشىسى.
ناۋقاس – 34 جاستاعى قالا تۇرعىنى. وپەراسيادان كەيىن ۇيىنە شىققان جىگىت ءوزىنىڭ جۇرەك پروبلەمالارىنىڭ ەنەرگەتيكالىق سۋسىنداردى كوپ ىشۋىنەن باستالعانىن اشىق ايتتى:
«باستاپقىدا كۇنىنە 1-2 ەنەرگەتيك ىشەتىنمىن، كەيىن ءارتۇرلى تۇرىنەن كۇنىنە 10 بوتەلكەگە دەيىن جەتتى. بۇل مەنىڭ قاتەلىگىم بولدى. دارىگەرلەرىمە العىسىم شەكسىز، ولار مەنىڭ ءومىرىمدى ساقتاپ قالدى»، – دەدى ناۋقاس.
دەنساۋلىق ساقتاۋ مينيسترلىگىنىڭ مالىمەتىنە قاراعاندا، ناۋقاس دونورلىق كەزەكتە تۇرعان. وپەراسيا بەس ساعاتقا سوزىلدى جانە ءساتتى اياقتالدى.
«ناۋقاسقا تەرمينالدى سوزىلمالى جۇرەك جەتكىلىكسىزدىگى دياگنوزى قويىلعان. جۇرەك ترانسپلانتاسياسىن الماتى قالالىق كارديولوگيالىق ورتالىعىنىڭ مۋلتيديسيپلينارلىق كومانداسى University Medical Center (استانا) ماماندارىمەن بىرلەسە وتىرىپ ورىندادى. وپەراسيانى قكو ديرەكتورى ەرماعامبەت قۋاتبايەۆ پەن UMC باسقارما ءتوراعاسى، پروفەسسور يۋريي ۆلاديميروۆيچ پيا جەتەكشىلىك ەتتى. UMC كومانداسى ارىپتەستەرىن قولداۋ ءۇشىن الماتىعا جەدەل كەلدى»، – دەپ حابارلادى دسم باسپا ءسوز قىزمەتى.