الماتىنىڭ باس جوسپارىن تۇزەتۋ – مەگاپوليستى جاڭعىرتۋدىڭ ماڭىزدى كەزەڭدەرىنىڭ ءبىرى. قالانىڭ ءوسۋ قارقىنى قالا قۇرىلىسى شەشىمدەرىن ۋاقىتىلى جاڭارتۋدى تالاپ ەتەدى. الايدا تۇزەتۋلەردىڭ باستى سەبەبى مەملەكەت باسشىسىنىڭ تاۋلى ايماقتاردا قۇرىلىس سالۋعا تىيىم سالۋ جونىندەگى تاپسىرماسى بولدى.
ەلىمىزدىڭ قۇرمەتتى ساۋلەتشىسى جانات ايتىلەۋدىڭ ايتۋىنشا، باس جوسپار بۇل قالانىڭ قازىرگى احۋالىن كورسەتىپ قانا قويماي، سونىمەن بىرگە قالالىق ورتانى ۇزاقمەرزىمدى رەتتەۋدىڭ دە قۇرالى.
«تاۋ بوكتەرىندە قۇرىلىس جۇرگىزۋگە شەكتەۋ قويۋ مەگاپوليستىڭ ءوسۋ مودەلىن وزگەرتىپ، قالا قۇرىلىسى پارامەترلەرىن قايتا قاراۋدى تالاپ ەتەدى. بۇل ايماق – ءومىر ساپاسىن ايقىندايتىن تابيعي رەسۋرس. پرەزيدەنت تاپسىرماسى جاڭا قالا قۇرىلىسى ساياساتىنىڭ ىرگەتاسىنا اينالىپ وتىر. باس جوسپاردى قايتا قاراۋ قالانىڭ دامۋىن نەعۇرلىم تۇراقتى ارناعا بۇرىپ، تابيعي جۇيەنى ساقتاۋ جانە حالىق سانىنىڭ بۇرىنعى بولجامداردان اسىپ ءتۇسۋىن ەسكەرۋ ءۇشىن قاجەت. بۇل تۇزەتۋ ءبىلىم، مەديسينا، تۇرعىن ءۇي سالالارىنداعى قاجەتتىلىكتى ناقتىلاۋدى، سونداي-اق كولىك ينفراقۇرىلىمىنىڭ قابىلەتىن قايتا ەسەپتەۋدى قامتيدى»، – دەدى ساراپشى.
ول الماتىداعى كولىك جۇكتەمەسى ءالى دە باستى ماسەلەلەردىڭ ءبىرى ەكەنىن جەتكىزدى. سوندىقتان جاڭارتىلعان باس جوسپار قوعامدىق كولىكتى دامىتۋعا، سونىڭ ىشىندە تىعىز قۇرىلىسى بار نەمەسە رەلەفكە بايلانىستى جولدى كەڭەيتۋ مۇمكىن ەمەس جەرلەردە اسپالى جول سىندى يننوۆاسيالىق شەشىمدەرگە ەرەكشە نازار اۋدارادى.
سونىمەن قاتار، باس جوسپاردى تۇزەتۋ جوباسىندا ساياباقتاردان باستاپ سكۆەرلەرگە دەيىن تولىققاندى جاسىل ايماقتار جەلىسىن قالىپتاستىرۋ كوزدەلگەن. ماقسات — حالىقتى جاسىل جەلەكپەن قامتاماسىز ەتۋ بويىنشا حالىقارالىق ستاندارتتارعا (ءبىر ادامعا كەمىندە 16 م²) جاقىنداۋ.
«باس جوسپاردى تۇزەتۋ كولىك پەن الەۋمەتتىك ينفراقۇرىلىمدى دامىتۋعا، ستراتەگيالىق مەملەكەتتىك باسىمدىقتاردى ىسكە اسىرۋعا، جايلى، ءقاۋىپسىز ءارى ەكولوگيالىق قالا قالىپتاستىرۋعا نەگىز بولادى. بۇل الماتىنى ۇيلەسىمدى، جاسىل ءارى زاماناۋي قالاعا اينالدىرۋ مۇمكىندىگى. ەڭ باستىسى، بەكىتىلگەن ستراتەگيانى جۇيەلى تۇردە جۇزەگە اسىرۋ»، – دەدى جانات ايتىلەۋ.