الماتىدا جاستاردىڭ قۇقىقتىق ساناسىن ارتتىرۋعا، ازاماتتىق جاۋاپكەرشىلىك قالىپتاستىرۋعا جانە زاڭعا قۇرمەت مادەنيەتىن نىعايتۋعا باعىتتالعان كەشەندى باعدارلاما ىسكە اسىرىلىپ جاتىر. جوبا الماتى قالاسى جاستار ساياساتى باسقارماسىنىڭ باستاماسىمەن، «زاڭ مەن ءتارتىپ» يدەولوگەماسىن ىسكە اسىرۋ جونىندەگى 2025-2030 جىلدارعا ارنالعان ءىس-قيمىل جوسپارى اياسىندا قولعا الىنعان.
باعدارلاما قۇقىق بۇزۋشىلىقتىڭ الدىن الۋ، سىبايلاس جەمقورلىققا قارسى مادەنيەتتى دامىتۋ جانە جاستاردىڭ بەلسەندى ازاماتتىق ۇستانىمىن قالىپتاستىرۋدى قامتيدى. بيىل جىل باسىنان بەرى قالادا 330-دان استام ءتۇرلى فورماتتاعى ءىس-شارا ۇيىمداستىرىلىپ، ولارعا 20 مىڭنان استام جاس قاتىستى.
ءىس-شارالار قاتارىندا «ناركوSTOP» اكسيالارى، پروفيلاكتيكالىق رەيدتەر، «زاڭ جانە جاستار: سانالى ازامات مادەنيەتى» اتتى كەزدەسۋلەر، دوڭگەلەك ۇستەلدەر، قۇقىقتىق دارىستەر، سەمينارلار، پىكىرتالاستار، case-چەمپيوناتتار، ۆيكتورينالار، قۇقىقتىق كۆيزدەر، فوتوكۆەستەر مەن ونلاين-اكسيالار ءوتتى. ءىس-شارالار كوميۋنيتي ورتالىقتاردا، جوعارى وقۋ ورىندارى مەن كوللەدجدەردە، ستۋدەنتتەر ۇيىندە جانە ونلاين پلاتفورمالاردا ۇيىمداستىرىلدى.
جوعارى وقۋ ورىندارى مەن كوللەدجدەردە دەپۋتاتتار، زاڭگەرلەر جانە مەدياتورلار قاتىسقان 30-دان استام ءدارىس، سەمينار جانە دوڭگەلەك ۇستەل وتكىزىلدى. سونداي-اق، ءال-فارابي اتىنداعى قازۇۋ بازاسىندا سىبايلاس جەمقورلىقتىڭ الدىن الۋعا باعىتتالعان «ۋنيۆەرسيتەت – جەمقورلىقسىز» جوباسى جۇزەگە اسىرىلدى.
«زاڭ مەن ءتارتىپ – بۇل تىيىمدار جۇيەسى ەمەس، ەڭ الدىمەن جاستاردىڭ كۇندەلىكتى ومىرىندەگى جاۋاپكەرشىلىك پەن سانالى تاڭداۋ. ءبىزدىڭ مىندەت – جاستارعا زاڭدى ءتۇسىندىرۋ عانا ەمەس، ونى ومىرلىك قۇندىلىق رەتىندە قابىلداۋعا جاعداي جاساۋ»، – دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.
سونىمەن قاتار، «ناركوSTOP» جوباسى اياسىندا زاڭعا قۇرمەت پەن جاۋاپكەرشىلىك قۇندىلىقتارىن ناسيحاتتايتىن ۆەرتيكالدى حيكايا ىسكە قوسىلدى. بۇگىنگى تاڭدا ەكى سەريا جارىق كورىپ، الەۋمەتتىك جەلىلەر ارقىلى كەڭىنەن تارالىپ جاتىر.
جاستار ساياساتى باسقارماسى سونداي-اق، «انتيكوررۋپسيالىق ەرىكتىلىك» جانە «Adal Urpaq» جوبالارىن جۇزەگە اسىرىپ وتىر. الاتاۋ اۋدانىندا 300-دەن استام بەلسەندى جاستى بىرىكتىرگەن فرونت كەڭسە جۇمىس ىستەيدى، ونىڭ 100-دەن استامى تۇراقتى نەگىزدە قىزمەت اتقارادى. جوبا اياسىندا 20-دان استام مونيتورينگ، 30-دان استام كوشپەلى كەڭەس وتكىزىلىپ، ادالدىق پەن ادىلەتتىلىكتى بەينەلەيتىن كولەمدى مۋرال سالىندى.
بۇدان بولەك، جەتىسۋ اۋدانىندا «ادىلەت» جاستار قوزعالىسىن قۇرۋ جۇمىستارى باستالدى. قوزعالىس قۇقىقتىق مادەنيەتتى دامىتۋعا، زاڭدىلىق پەن ادىلەت قۇندىلىقتارىن نىعايتۋعا جانە سىبايلاس جەمقورلىققا توزبەۋشىلىك قاعيداتتارىن قالىپتاستىرۋعا باعىتتالعان.
وسىلايشا، «زاڭ مەن ءتارتىپ» يدەولوگەماسىن ىلگەرىلەتۋ الماتىدا جاستارمەن بىرگە جۇرگىزىلەتىن جۇيەلى جۇمىستىڭ ماڭىزدى باعىتىنا اينالىپ، قۇقىقتىق ساۋاتتى، جاۋاپتى ءارى بەلسەندى جاس ۇرپاق قالىپتاستىرۋعا نەگىز بولىپ وتىر.