الماتى اكىمى ەربولات دوسايەۆ جۇمىس ساپارى بارىسىندا تۇركسىب اۋدانىنداعى جاس قانات ش/ا سالىنعان جاڭا دەنەشىنىقتىرۋ-ساۋىقتىرۋ كەشەنىنە (دسك) باردى، دەپ حابارلايدى aqshamnews.kz
كۇنىنە 600 ادامدى قابىلداي الاتىن جاڭا سپورت نىسانى جەرگىلىكتى تۇرعىندارعا ساپالى سپورت جابدىقتارىنا قول جەتكىزۋگە جانە ۇيلەرىنە جاقىن جەردە ءارتۇرلى سپورت تۇرلەرىمەن اينالىسۋعا مۇمكىندىك بەرەدى.
نىسانداعى قۇرىلىس-مونتاج جۇمىستارى 2020 جىلدىڭ جەلتوقسانىندا باستالدى. الايدا شارتتىق مىندەتتەمەلەردىڭ بۇزىلۋىنا بايلانىستى مەردىگەر – «بۋرعان2005» ج ش س 2022 جىلعى جەلتوقساندا سوت قاۋلىسىمەن مەملەكەتتىك ساتىپ الۋعا جوسىقسىز قاتىسۋشى بولىپ تانىلدى. كومپانيادان تۇراقسىزدىق ايىبى ءوندىرىلىپ، قۇرىلىس-مونتاج جۇمىستارىن اياقتاۋ مىندەتتەلدى.
ەربولات دوسايەۆتىڭ جاڭا كەشەنگە ساپارى جانە سپورتشىلارمەن كەزدەسۋ
جاڭا دەنەشىنىقتىرۋ-ساۋىقتىرۋ كەشەنىنە بارعان كەزىندە الماتى اكىمى وليمپيادا جەڭىمپازدارى مەن جۇلدەگەرلەرى دميتريي بالاندينمەن، الەكساندرا لە جانە يسلام ساتبايەۆپەن كەزدەستى.
سپورتشىلارمەن اڭگىمەلەسۋ بارىسىندا ەربولات دوسايەۆ تۇركسىب اۋدانىنداعى «اۆياتور» ستاديونىندا تاعى ءبىر دسك سالىناتىنىن اتاپ ءوتتى. جاڭا جوبادا وق اتۋعا ارنالعان زاماناۋي زال جانە سپورتتىق جارىستار وتكىزۋگە بولاتىن ەلۋ مەترلىك باسسەين قاراستىرىلعان.
«جاس قانات شاعىن اۋدانىنداعى جاڭا دەنەشىنىقتىرۋ-ساۋىقتىرۋ كەشەنى جاس سپورتشىلار مەن جەرگىلىكتى تۇرعىنداردىڭ سپورتپەن شۇعىلدانۋىنا ارنالعان تارتىمدى ورىنعا اينالادى. زاماناۋي ستاندارتتارعا ساي كەلەتىن دەنەشىنىقتىرۋ-ساۋىقتىرۋ كەشەندەرى قالامىز ءۇشىن اسا قاجەت. ءبىز ولاردىڭ قۇرىلىسى كەزىندە بارلىق تۇرعىنداردىڭ قاجەتتىلىكتەرىن قاناعاتتاندىرۋعا باعىتتالعان كەشەندەر جەلىسىن قۇرۋدى ماقسات ەتەمىز»، – دەپ اتاپ ءوتتى ەربولات دوسايەۆ وليمپياداشىلارمەن كەزدەسۋ بارىسىندا.
كەشەننىڭ جۇمىس كەستەسى
الماتى اكىمىنىڭ الدىڭعى تاپسىرمالارىن ەسكەرە وتىرىپ، جاس قانات شاعىن اۋدانىنداعى دسك كەستەسى جمدب تاربيەلەنۋشىلەرىنىڭ ساباقتارىنا جانە اۋدان تۇرعىندارىنىڭ قاجەتتىلىكتەرىنە سايكەس جاسالدى. كەشەنگە سەنبى جانە جەكسەنبى كۇندەرى دە كەلۋگە بولادى.
الماتىداعى باسقا سپورتتىق نىساندار
ەستەرىڭىزگە سالا كەتەيىك، وسى ايدا زەردەلى ش/ا كۇنىنە 400 كەلۋشىگە ارنالعان جاڭا دەنەشىنىقتىرۋ-ساۋىقتىرۋ كەشەنى اشىلدى. قازىرگى ۋاقىتتا الماتىدا ءۇش (شۇعىلا، سايالى جانە اۆياتور شاعىن اۋداندارىندا) دسك سالۋ بويىنشا جوبالىق-سمەتالىق قۇجاتتاما ازىرلەنۋدە. سونىمەن قاتار ەرەكشە قاجەتتىلىكتەرى بار ادامدارعا ارنالعان سپورت ورتالىعىن سالۋ جوسپارلانىپ وتىر.