دەپۋتاتتار زاڭ جوباسىن ءبىرىنشى وقىلىمدا ماقۇلدادى
پارلامەنت ءماجىلىسى كەيبىر زاڭنامالىق اكتىلەرگە "مەملەكەتتىك كورپوراسيا ماسەلەلەرى بويىنشا وزگەرىستەر ەنگىزۋ تۋرالى" زاڭ جوباسىن ءبىرىنشى وقىلىمدا ماقۇلدادى، دەپ حابارلايدى Almaty-akshamy.kz
دەپۋتات، زاڭناما جانە سوت-قۇقىقتىق رەفورما كوميتەتىنىڭ مۇشەسى دانابەك يسابەكوۆتىڭ ايتۋىنشا، زاڭ جوباسىندا مەملەكەتتىك قىزمەتتەردى تىكەلەي كورسەتەتىن جانە قولجەتىمدىلىگى شەكتەۋلى دەربەس دەرەكتەرگە قولجەتىمدىلىگى بار مەملەكەتتىك كورپوراسيا قىزمەتكەرلەرىن مەملەكەتتىك فۋنكسيالاردى ورىنداۋعا ۋاكىلەتتىك بەرىلگەن ادامدارعا تەڭەستىرۋ نورماسى كوزدەلگەن. قىلمىستىق كودەكسكە جانە "سىبايلاس جەمقورلىققا قارسى ءىس-قيمىل تۋرالى" زاڭعا وزگەرىستەر ەنگىزىلۋدە.
"بۇل تۇزەتۋلەر مەملەكەتتىك كورپوراسيا قىزمەتكەرلەرى تاراپىنان تەرىس پايدالانۋ مەن قۇقىقبۇزۋشىلىقتاردىڭ الدىن الۋعا، ازاماتتاردىڭ قۇقىقتارىن قورعاۋعا باعىتتالعان. قولدانىستاعى زاڭنامادا كوزدەلگەن قۇقىقبۇزۋشىلىقتار جاسالعان جاعدايدا، مەملەكەتتىك كورپوراسيانىڭ وسى قىزمەتكەرلەرى مەملەكەتتىك فۋنكسيالاردى ورىنداۋعا ۋاكىلەتتىك بەرىلگەندەرگە تەڭەستىرىلگەن رەتىندە جاۋاپتى بولادى"، - دەدى يسابەكوۆ ءماجىلىستىڭ جالپى وتىرىسىندا.
سونىمەن قاتار "ازاماتتارعا ارنالعان ۇكىمەت" مەملەكەتتىك كورپوراسياسى ۇعىمىن ودان قىزمەت باعىتتارىنا نۇسقاۋلاردى الىپ تاستاۋ جولىمەن وڭتايلاندىرۋ كوزدەلگەن. بۇل ءبىرىڭعاي پروۆايدەر ارقىلى كورسەتىلەتىن قىزمەت تۇرلەرىن ۇلعايتۋ بويىنشا ۇزدىكسىز جۇمىس ىستەۋگە مۇمكىندىك بەرەدى.
بۇعان قوسا مەملەكەتتىك كورپوراسياعا اقپاراتتىق جۇيە اياسىندا وتىنىشتەردى قابىلداۋدى ۇيىمداستىرۋ قۇزىرەتى بەرىلەدى. بۇل نورما ازاماتتارعا اكىمشىلىك ورگاندارعا جۇگىنۋگە، جاۋاپ الۋعا، سونداي-اق وتىنىشتەردى قاراۋ ساپاسىن باقىلاۋعا مۇمكىندىك بەرەتىن پيلوتتىق رەجيمدە تەكسەرىلگەن جۇيەنى ("ە-وتىنىش") پايدالانۋدى زاڭنامالىق تۇرعىدان بەكىتەدى.