الماتىلىق ءمۇعالىم ۇلان ۇسەنوۆ تىڭ يدەياسىمەن الەۋمەتتىك جەلىدە تانىمال.
جاڭاشىل ۇستاز حيميا ءپانىن قىزىقتى ءارى قاراپايىم فورماتتا وقىتادى. انمەن سۇيەمەلدەنگەن ساباقتارى تمد بويىنشا ميلليونداعان كورەرمەننىڭ ىقىلاسىنا بولەنگەن. حيميا ءپانىنىڭ ءمۇعالىمى ۇلان ۇسەنوۆ ونلاين ساباق بەرەدى، دەپ حابارلايدى Almaty-akshamy.kz 24.kz-كە سىلتەمە جاساپ.
TikTok جەلىسىندە ءبىلىم بەرۋ كونتەنتىن جۇرگىزۋ تۋرالى وي 2020 جىلعى پاندەميا كەزىندە كەلگەن. جەكە پاراقشا اشىپ، مەكتەپ باعدارلاماسىن جاپوندىق انيمە فورماتىندا وقىتا باستاعان. ال مەندەلەيەۆ كەستەسىندەگى ەلەمەنتتەردى وقۋشىلارعا تانىمال اندەر ارقىلى تۇسىندىرەدى ەكەن.
«بروم ەلەمەنتى اندرەي گۋبيننىڭ «ءتۇن» ءانى ارقىلى تانىمال بولىپ، 8 ميلليوننان اسا ادام كوردى. روليك استىنداعى پىكىردە وقىرماندار برومدى تالقىلاپ، ەلەمەنتتىڭ قۇرىلىمىن ەسكە ءتۇسىردى. وقۋشىلار بىر-بىرىمەن جارىسىپ، وسى ەلەمەنت تۋرالى بىلىمدەرىن تەرەڭدەتتى. وسىلايشا، حيمياعا قىزىعۋشىلىقتارى ارتا ءتۇستى»، - دەيدى حيميا ءپانىنىڭ ءمۇعالىمى ۇلان ۇسەنوۆ.
جاس ۇستاز ءار حيميالىق ەلەمەنت تۋرالى ءماتىندى ءوزى جازىپ، ءانىن ورىنداپ، جۇكتەپ وتىرادى. بۇگىنگە دەيىن ول 21 ەلەمەنت تۋرالى روليك تۇسىرگەن، قالعاندارى دايىندالىپ جاتىر. جالپى سانى 118 بەينەبايان جۇكتەمەك. ۇلاننىڭ جاڭالىعىن وزگە مۇعالىمدەر ساباق بارىسىندا پايدالانا باستاعان. ۇلان ۇسەنوۆ، حيميا ءپانىنىڭ ءمۇعالىمى: -
«ءار ەلەمەنتكە لايىقتى جاڭا ءان تابۋ كەرەك. سوندا عانا وقۋشىلار وڭاي ەستە ساقتايدى. قىزىقتى اقپارات، پايدالانۋ ماقساتى، قالاي وندىرىلەتىنى سىندى فاكتىلەر ماڭىزدى ءرول اتقارادى. وزگە مەملەكەتتەردەگى مۇعالىمدەر حابارلاسىپ، مەنىڭ روليكتەرىمدى ساباقتا پايدالانىپ جۇرگەنىن دە ايتتى»، - دەيدى حيميا ءپانىنىڭ ءمۇعالىمى ۇلان ۇسەنوۆ.
ۇلان ۇسەنوۆتىڭ ميلليوننان استام وقىرمانى بار. ولاردىڭ كوبى – وقۋشىلار مەن مۇعالىمدەر. ولار ءار ەلەمەنتتى مينۋتتىق روليك ارقىلى جىلدام جاتتاپ، باعدارلامانى جەڭىلدەتىپ جاتىر. وقىتۋشىنىڭ ماقساتى – وزگە ارىپتەستەرىن الەۋمەتتىك جەلىگە ۇيرەتىپ، وقۋشىلار قىزىعاتىن ونلاين الەمدى باعىندىرۋ.