بۇل عىلىم جانە جوعارى ءبىلىم ءمينيسترى ساياسات نۇربەكتىڭ ءسوزى.
ەلىمىز بويىنشا جاتاقحانادا 17 مىڭ ورىن جەتىسپەيدى، دەپ حابارلايدى Almaty-akshamy.kz
ساياسات نۇربەك ستۋدەنتتەردى جاتاقحانامەن قامتاماسىز ەتۋ قالاي جۇرگىزىلىپ جاتقانىن ايتتى.
پرەمەر-مينيستر ءاليحان سمايىلوۆ ۆەدومستۆو باسشىسىنان ستۋدەنتتەردى، ونىڭ ىشىندە، پەداگوگيكالىق ماماندىققا وقىپ جاتقان ستۋدەنتتەردى جاتاقحانامەن قامتاماسىز ەتۋ بويىنشا قانداي جۇمىستار جۇرگىزىلىپ جاتقانىن سۇرادى.
"قازىرگى تاڭدا، 17 مىڭ توسەك-ورىن تاپشىلىعى بار. سوڭعى جىلدا ءۇش ۇلكەن باعىتپەن جۇمىس ىستەدىك. ءبىرىنشىسى – سۋبسيديالار ارقىلى جاڭا جاتاقحانالاردى قۇرىلىسقا ەنگىزۋ. سۋبسيديالىق نورماتيۆتەر 2 ەسە ۇلعايتىلدى. ناتيجەسىندە بيىلدىڭ وزىندە 43 جاتاقحانا سالىنىپ جاتىر. ونىڭ 33ء-ى تولىققاندى ەنگىزىلدى. ستۋدەنتتەرىمىز وندا تۇرىپ جاتىر. قالعان 10-ى وسى ءبىر ايدىڭ ىشىندە تولىققاندى ەنگىزىلەدى. قۇجاتتاردى راسىمدەۋ پىسىقتالىپ جاتىر. بيىل 10367 توسەك-ورىندى قامتاماسىز ەتەمىز"، – دەدى مينيستر ۇكىمەت وتىرىسىندا.
ساياسات نۇربەكتىڭ دەرەگىنشە، 1 قىركۇيەكتەن باستاپ نورماتيۆتىك-قۇقىقتىق تالاپتار كۇشەيىپ، زاڭعا ءتيىستى وزگەرىستەر ەنگىزىلگەن.
"ەندى جوعارى وقۋ ورىندارى وسى وقۋ جىلىنىڭ قىركۇيەگىنەن باستاپ ستۋدەنتتەردىڭ كەمىندە 70 پايىزىن جاتاقحانامەن قامتاماسىز ەتۋى كەرەك. ءبىرىنشى جىل قابىلدانعاندا 100% قامتاماسىز ەتىلۋى ءتيىس. سوڭعى باعىتقا كەلسەك، قولدانىستا بولعان بيزنەس ورتالىقتارى، حوستەلدەر، قوناق ۇيلەردى رەكونسترۋكسيالاۋ بويىنشا نورماتيۆتىك سۋبسيديالار دا ۇلعايتىلىپ وتىر. بۇل دا ۇكىمەتتەن سول وبەكتىلەردى جاتاقحانالارعا اينالدىرۋدا ۇلكەن كومەك بولادى"، – دەدى ول.
قاۋىپسىزدىك ستاندارتتارىن كۇشەيتۋ – ەڭ ۇلكەن تالاپتىڭ ءبىرى، دەپ جالعاستىردى سپيكەر.
"مينيسترلىكتىڭ ارنايى بۇيرىعى ازىرلەندى. 15 ناقتى تالاپ ايقىندالدى. توتەنشە جاعدايلار، دەنساۋلىق ساقتاۋ مينيسترلىكتەرىمەن كەلىسىپ، ەندى كەز كەلگەن جاڭادان قۇرىلعان نەمەسە رەكونسترۋكسيادان وتەتىن حوستەل، جاتاقحانا، قوناق ءۇي بولسىن، وسى تالاپتارعا سايكەس بولۋى كەرەك. 17 مىڭ توسەك-ورىن تاپشىلىعى 1-2 جىلدىڭ ىشىندە تولىققاندى جابىلادى دەگەن جوسپارىمىز بار"، – دەپ تولىقتىردى عىلىم جانە جوعارى ءبىلىم ءمينيسترى.