الماتىداعى حوستەلدە قازا تاپقانداردىڭ تىزىمىندە كورسەتىلگەن تۇركىستان وبلىسىنىڭ تۇرعىنى ءتىرى بولىپ شىقتى.
سارىاعاش اۋدانى، دەربىسەك اۋىلىندا تۇراتىن 20 جاستاعى ازامات رامازان ءامىرالى ءقازىر اتا-اناسىنىڭ جانىندا، دەپ حابارلايدى Almaty-akshamy.kz.
شىمكەنتتەگى مەدرەسەلەردىڭ بىرىندە وقيتىن ول ەكى اپتا بۇرىن الماتىعا بارىپ، سول حوستەلدە ءبىر ءتۇن تۇنەگەنىن ايتادى. دەنساۋلىعىن تەكسەرتۋگە بارعان رامازان ەرتەسىنە اۋىلىنا ورالىپتى. الايدا قايتىس بولعانداردىڭ تىزىمىنە قالاي ەنىپ كەتكەنىن ءوزى دە تۇسىنبەي وتىر. ورتتەن كەيىن ونىڭ تۋىستارىنا كوڭىل ايتىپ حابارلاسقاندار كوپ بولعان كورىنەدى.
«ارادا 12-13 كۇن وتكەننەن كەيىن وقيعاعا مەنىڭ ءتىزىمىم شىعىپ تۇر دا. مەن ءبىر-اق كۇن قونعام. تۇندە بارىپ، ازاندا شىعىپ كەتكەم ول جەردەن. ءبىرىنشى ەستىگەن كەزدە ءوزىڭ قورقاسىڭ عوي. قۇداي ساقتاپ قالىپتى دەيسىڭ. ءبىز كەتىپ قالعاننان كەيىن بولىپتى دەيسىڭ. بۇكىل تۋعان تۋىسقانداردىڭ بارلىعى ۇيگە كوڭىل ايتىپ، ۋجە زۆونداپ جاتقان ەدى»، - دەيدى دەربىسەك اۋىلىنىڭ تۇرعىنى رامازان ءامىرالى.