تۋرنير كەستەسىندە قۇرامالار سوڭعى ورىنداردا تۇرعان ەدى
شايبالى حوككەيدەن 2023 جىلعى الەم چەمپيوناتىنىڭ ەليتالىق ديۆيزيونىندا قازاقستان قۇراماسى سلوۆەنيامەن كەزدەستى، دەپ حابارلايدى Almaty-akshamy.kz قازاقپاراتقا سىلتەمە جاساپ.
تۋرنير كەستەسىندە قۇرامالار سوڭعى ورىنداردا تۇرعان ەدى.
سلوۆەنيالىق قۇراما التى ويىننان كەيىن ءبىر دە ءبىر ۇپاي الا العان جوق. سالدارىنان ءبىر تۋر بۇرىن ءبىرىنشى ديۆيزيونعا ءتۇسىپ قالاتىنى بەلگىلى بولدى.
ال قازاقستاندىق حوككەيشىلەر بيىلعى الەم چەمپيوناتىندا التى كەزدەسۋ وتكىزدى. بۇعان دەيىن بۋلليتتەن نورۆەگيا مەن سلوۆاكيانى 4:3 ەسەبىمەن جەڭدى.
ال چەحيا مەن كاناداعا 1:5، شۆەيسارياعا 0:5، لاتۆياعا 0:7 ەسەبىمەن جول بەردى.
بۇگىنگى كەزدەسۋدى سلوۆەنيالىق حوككەيشىلەر بەلسەندى باستادى.
ناتيجەسىندە 1-مينۋتتا انجە كۋرالت ەسەپ اشىپ كەتتى. وعان 18-مينۋتتا قازاقستاندىق نيكيتا ميحايليس ءبىر گولمەن جاۋاپ قايىردى.
ەكىنشى كەزەڭنىڭ 21-مينۋتىندا انجە كۋرالت ءوز قۇراماسىن تاعى العا شىعارسا، 39-مينۋتتا قازاقستاندىق باتىرلان مۇراتوۆتىڭ گولىنان كەيىن قايتادان تارازى باسىن تەڭەستى.
ءۇشىنشى كەزەڭدە سلوۆەنيالىق يان دروزگ 42-مينۋتتا مەرگەندىك تانىتتى، ودان كەيىن قازاقستاندىق ەۆگەنيي رىماريەۆ 51، ماكسيم مۋحامەتوۆ 56-مينۋتتا ەكى شايبا سوقتى.
وسىلايشا ەل قۇراماسى قارسىلاسىنان 4:3 ەسەبىمەن باسىم ءتۇستى.
ەكى قۇراما بۇعان دەيىن ون ءبىر مارتە كەزدەسكەن. سەگىز ويىندا قازاقستان، ۇشەۋىندە سلوۆەنيا جەڭىسكە جەتتى.
ەندى 23 مامىردا جەتىنشى تۋردىڭ قالعان ويىندارى وتكىزىلەدى.
قازاقستاندىق حوككەيشىلەر 2024 جىلعى الەم چەمپيوناتى ەليتالىق ديۆيزيونداعى ويىنىنا قاتىسۋ مۇمكىندىگىن ساقتاپ قالدى.
ءدۇبىرلى دودا الداعى جىلدىڭ 10-26 مامىر ارالىعىندا چەحيانىڭ پراگا جانە وستراۆا قالالارىندا وتەدى.
ايتا كەتسەك، بيىل ۆەنگريا مەن سلوۆەنيا قۇرامالارى ەليتالىق ديۆيزيوننان ءتۇسىپ قالدى.