8-9 قىركۇيەك كۇندەرى وزبەكستاننىڭ حيۋا قالاسىندا حالىقارالىق ەتنوسپورت ءسامميتى ءوتتى.
اتالمىش جيىنعا 60-تان استام ەلدىڭ ۇكىمەتتىك شەنەۋنىكتەرى، فەدەراسيا وكىلدەرى مەن عالىمدارى، سونداي-اق قازىرگى ۋاقىتتا دۇنيەجۇزىلىك ەتنوسپورت كونفەدەراسياسىنا كىرگەن ەلدەردەگى ارنايى مەكەمەلەردەن 24 وكىل كەلدى، دەپ حابارلايدى Almaty-akshamy.kz.
سونداي-اق، سامميتكە دۇنيەجۇزىلىك ەتنوسپورت كونفەدەراسياسىنىڭ پرەزيدەنتى ناجمەددين ءبىلال ەردوعان مەن وزبەكستان رەسپۋبليكاسى جاستار ساياساتى جانە سپورت ءمينيسترى ادحام يكراموۆتىڭ ارنايى شاقىرتۋىمەن قازاقستان رەسپۋبليكاسى تۋريزم جانە سپورت ۆيسە-مينيسترى سارسەن قۇرانبەك پەن قازاقستان رەسپۋبليكاسى ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ تا قاتىستى.
سامميت اياسىندا جوعارى دەڭگەيدەگى مينيسترلەر القاسى، ەتنوسپورت فەستيۆالى جانە دۇنيەجۇزىلىك ەتنوسپورت كونفەدەراسياسى مۇشەلەرىنىڭ VI كەزدەسۋى سياقتى ماڭىزدى ءىس-شارالار ۇيىمداستىرىلدى.
تالقىلاۋلار وتكەن كەلەلى جيىنداردا ۇلتتىق سپورت تۇرلەرىن دامىتۋ جانە ونىڭ اۋقىمىن كەڭەيتۋ ماسەلەلەرى قوزعالىپ، ناقتى ۇسىنىستار ايتىلدى.
جيىندا ارنايى ءسوز العان قازاقستان رەسپۋبليكاسى ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ سامميتكە قاتىسۋشىلاردى كەلەسى جىلى قازاقستاندا وتەتىن Vء-شى دۇنيەجۇزىلىك كوشپەندىلەر ويىندارىنا شاقىرىپ، ءبىرقاتار ماسەلەلەردى كوتەردى.
«الەمدىك تاجىريبەگە سۇيەنەتىن بولساق، قانداي دا ءبىر سپورت ءتۇرىن جوعارى دەڭگەيگە كوتەرۋ ءۇشىن ەڭ الدىمەن ونى رەگلامەنتتەپ، ەرەجەسىن جاساپ جەتىلدىرۋ قاجەت. ونسىز ەشقانداي سپورت ءتيىستى دەڭگەيدە دامىمايدى.
سول سەكىلدى تۇركىتىلدەس مەملەكەتتەر جينالىپ ۇلتتىق سپورت تۇرلەرىنە ورتاق ەرەجە بەكىتىپ، نورماتيۆتىك بازاسىن قالىپتاستىرۋ ارقىلى بولاشاقتا ۇلتتىق سپورتتىڭ ءبىر ءتۇرىن وليمپيادا ويىندارىنىڭ باعدارلاماسىنا كىرگىزسەك بارشامىزدىڭ ورتاق جەڭىسىمىز بولار ەدى.
سوندىقتان دا بۇكىلالەمدىك ەتنوسپورت كونفەدەراسياسىنا مۇشە بارلىق مەملەكەتتەر جۇدىرىقتاي جۇمىلا العا قويعان ورتاق ماقساتتارىمىزعا جەتەمىز دەگەن ۇمىتتەمىن» دەپ ايتتى قازاقستان رەسپۋبليكاسى ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ.
ايتا كەتەيىك، بۇگىندە دۇنيەجۇزىلىك ەتنوسپورت كونفەدەراسياسىنا 16 مەملەكەت مۇشە. ولار: قازاقستان، قىرعىزستان، تۇركيا، ءازىربايجان، موڭعوليا، ۆەنگريا، گرۋزيا، رەسەي، ارگەنتينا، جاپونيا، مەكسيكا، پولشا، كاتار، رۋمىنيا، تۋنيس، ليتۆا.
.