حيۋا - يسلام الەمىنىڭ تۋريستىك شاھارى

وزبەكستاننىڭ حيۋا قالاسىنا يسلام الەمىنىڭ تۋريستىك شاھارى مارتەبەسى بەرىلدى.

مۇنى ايعاقتايتىن ارنايى سەرتيفيكاتتى يسلام ىنتىماقتاستىعى ۇيىمىنىڭ باسشىلىعى تابىس ەتتى، دەپ حابارلايدى Almaty-akshamy.kz.

ەكى جىل بۇرىن ۇيىمعا مۇشە ەلدەردىڭ سەسسياسىندا حيۋا، ءابۋ-دابي، شانلىۋرفا، لاگوس پەن دۋشانبە «2024 جىلعى يسلام الەمىنىڭ تۋريستىك شاھارى» مارتەبەسىنە ۇسىنىلعان. ورتا ازياداعى بەس قالانىڭ ىشىنەن حيۋا لايىق دەپ تانىلدى.

2500 جىلدىق تاريحى بار حيۋا قالاسىنداعى ەرەكشە شاراعا يسلام ىنتىماقتاستىعى ۇيىمىنىڭ وكىلدەرى، ساراپشىلار مەن تۋريزم سالاسىنا جاۋاپتى ازاماتتار كەلگەن. تاريحي شاحارعا يسلام الەمىنىڭ تۋريستىك استاناسى مارتەبەسىنىڭ بەرىلۋى حيۋانىڭ ساياحاتشىلار ءۇشىن اسا تانىمال باعىتقا اينالۋىنا مۇمكىندىك بەرەدى.

«بۇل شاحار ەجەلدەن مادەنيەتتىڭ، عىلىم مەن وركەنيەتتىڭ ورتالىعى رەتىندە تانىلعان. استرونوميا، ماتەماتيكا، حيميا ىلىمدەرى بويىنشا كوپتەگەن وقۋ ورىندارى مەن ءىرى عىلىمي ورتالىق ءدال وسى قالادا بولدى. حيۋا ءوزىنىڭ باي تاريحىمەن، ءارى بىرەگەي ساۋلەتىمەن ورتاق مۇرامىزدىڭ ماڭىزىن ايشىقتاپ كەلەدى»، - دەيدى يسلام ىنتىماقتاستىعى ۇيىمى باس حاتشىسىنىڭ ورىنباسارى احماد كاۆەسا سەنگەندو. 

بىلتىر حيۋاعا 500 مىڭنان استام تۋريست كەلگەن. الداعى ۋاقىتتا ساياحاتشىلار سانىن 1 ملنعا دەيىن جەتكىزۋ ءۇشىن قاجەتتى جاعداي جاسالىپ جاتىر. اتاقتى حيۋا قالاسى ورتالىق ازيادا بىرنەشە مىڭ جىلدىق تاريحتىڭ سىرىن قويناۋىنا بۇككەن جانە تولىق ساقتالعان جالعىز شاھار. 1990 جىلى يۋنەسكو-نىڭ شەشىمىمەن «دۇنيەجۇزىلىك مۇرا نىساندارى» تىزىمىنە ەندى.

«ساياحاتشىلارعا جاعداي جاساۋدى بارىنشا جاقساترتۋ باستى نازاردا. تۋريزم سالاسىندا قىزمەت كورسەتەتىن ازاماتتاردى شەتەلدە وقىتۋ جولعا قويىلعان. مۇنان وزگە حيۋانىڭ تاريحىن كوپشىلىككە كەڭىنەن ناسيحاتتاۋعا دەن قويىپ كەلەمىز. زيارات ءتۋريزمى باعىتىندا فەستيۆال وتكىزۋدى جوسپارلاپ وتىرمىز»، - ءتۋريزمدى دامىتۋ كوميتەتىنىڭ باسقارما باسشىسى يبروحيم بارنويەۆ. 

شارا بارىسىندا حيۋا قالاسىنىڭ حوكيماتىنا «2024 جىلعى يسلام الەمىنىڭ تۋريستىك استاناسى» مارتەبەسىنىڭ سەرتيفيكاتى تابىستالدى. بيىل مامىر ايىندا يىۇ-عا مۇشە ەلدەردىڭ سەسسياسى وتپەك. وندا «حورەزم حاندارىنىڭ تاعامدارى» اتتى گاسترونوميالىق فەستيۆال، فوتو جانە كوركەم تۋىندىلار كورمەسىن وتكىزۋ جوسپارى بار.