الماتىدا ومىرتقانىڭ ستەنوزى بار ناۋقاستاردى حيرۋرگيالىق ەمدەۋدىڭ جاڭا ءادىسى ەنگىزىلدى
الماتىداعى №7 قالالىق كلينيكالىق اۋرۋحانانىڭ دارىگەرلەرى بەل ومىرتقاسىنىڭ ستەنوزىنا شالدىققان ناۋقاستاردى حيرۋرگيالىق ەمدەۋدىڭ جاڭا ادىستەمەسىن يگەردى. كەلەسى كۇنى ناۋقاستاردى اياعىنا تۇرعىزادى، دەپ حابارلايدى almaty-akshamy.kz
دارىگەرلەر مۇنداي وپەراسيالاردى مىندەتتى الەۋمەتتىك مەديسينالىق ساقتاندىرۋ ەسەبىنەن بىرەگەي ادىسپەن جاسايدى. مۇنداي وپەراسيانىڭ ارتىقشىلىعى تۋرالى №7 قالالىق كلينيكالىق اۋرۋحاناداعى №1 نەيروحيرۋرگيالىق بولىمشەنىڭ مەڭگەرۋشىسى باقىت اعلاقوۆ ايتىپ بەردى.
ايتا كەتەرلىك دەرەك، بۇل ءادىس قازاقستاننىڭ ساناۋلى عانا اۋرۋحانالارىندا قولدانىلادى، بۇل ونى بىرەگەي ەتەدى. ال الماتىدا ونى جەتىنشى اۋرۋحانانىڭ نەيروحيرۋرگتەرى جۇزەگە اسىرۋعا كىرىستى. ەڭ العاشقى وتا مىندەتتى مەديسينالىق ساقتاندىرۋ اياسىندا 75 جاستاعى قارياعا جاسالدى.
اقساقالدىڭ ۋزاق ۋاقىت بويى بەل اۋماعىنداعى اۋرۋ سەزىمىنە جانە اۋرۋ سەزىمىنىڭ از فيزيكالىق بەلسەندىلىك كەزىندە كۇشەيەتىنىنە شاعىمدارى بولعان . اقساقالعا بەل ومىرتقاسىنىڭ دەگەنەراتيۆتى-ديستروفيالىق وزگەرىستەرى جانە ستەنوز دەگەن دياگنوز قويىلعان. ال بۇرىن قابىلداعان ەمى مۇلدەم كومەكتەسپەدى.
دارىگەر اتاپ وتكەندەي، ادەتتە ومىرتقانىڭ ستەنوزى بار ناۋقاستار اۋرۋحاناعا وتە ناشار كۇيدە تۇسەدى، ءتىپتى ءجۇرۋ قيىنعا سوعادى.
«ول 100-200 مەتردەن ارتىق جۇرە المادى، سودان كەيىن اياعىنىڭ ۇيۋى مەن اۋىرۋى كۇشەيىپ، اياعىنىڭ السىزدىگى مەن ءارى قاراي قوزعالا الماۋىنا ۇلاستى. اياقتارىنداعى ۇيىپ كەتۋدى جويۋ ءۇشىن وعان بەلگىلى ءبىر ۋاقىت وتىرۋ كەرەك بولدى. بۇل اۋرۋ ونى سوڭعى 5 جىلدا قينادى»، - دەيدى نەيروحيرۋرگ اعلاقوۆ.
سوندىقتان دارىگەرلەر سارى بايلامدى ميكروحيرۋرگيالىق جولمەن الىپ تاستاۋ ءۇشىن ءبىرىنشى از ءينۆازيۆتى وپەراسيا جاساۋدى ۇيعاردى.
«ميكروسكوپتىڭ استىندا ديامەترى 12 مم بولاتىن تۇتىك ارقىلى قاجەتتى تىلىك جاسالادى. ال كەسۋدىڭ ءوزى 1،5 سم-دەن اسپايدى. بۇل ءادىستىڭ ارتىقشىلىقتارىنىڭ ءبىرى. تۇتىكشەلى تاسىلدەر ارقىلى از ءينۆازيۆتى وپەراسيالار بەل ومىرتقاسىنىڭ ستەنوزىن ەمدەۋدە قولدانىلاتىن ءتيىمدى ءادىس بولىپ تابىلادى»، - دەيدى دارىگەر.
جاڭا تەحنولوگيانىڭ ارتىقشىلىقتارىنا مىنالار جاتادى:
- فاسەتتىك بۋىندار مەن ارقا بۇلشىقەتتەرىن ساقتاي وتىرىپ، جۇيكە قۇرىلىمدارىن دالمە- ءدال الىپ تاستاۋ مۇمكىندىگى. بۇل پاسيەنتتەرگە بەل ومىرتقاسىنداعى بولاشاق تۇراقسىزدىقتى بولدىرماۋعا كومەكتەسەدى؛
- جەدەل حيرۋرگيالىق وپەراسياعا قول جەتكىزۋ، ويتكەنى ول بايلامداردى از كەسۋدى قاجەت ەتەدى؛
- ناۋقاستىڭ ەرتە ساۋىعۋى، وپەراسيادان كەيىنگى از اۋىرسىنۋ جانە وپەراسيادان كەيىنگى اۋىرسىنۋدى باساتىن دارىلەردى از قولدانۋ.
«ناۋقاس ناركوزدان ويانعاننان كەيىن اۋىرسىنۋ مەن ۇيۋدىڭ جوقتىعىن جانە جاتقان قالپىندا بەلسەندى قوزعالىس اۋقىمىنىڭ ارتۋىن اتاپ ءوتتى. جاسى ۇلكەن ادامعا قالپىنا كەلۋ ءۇشىن كوپ ۋاقىت قاجەت سياقتى بولىپ كورىنەدى. ءبىراق اعامىز كەلەسى كۇنى ءوز بەتىنشە جۇرە باستادى»، - دەپ دارىگەر اعلاقوۆ وتانىڭ ناتيجەسىمەن ءبولىستى.
№7 قالالىق كلينيكالىق اۋرۋحانانىڭ نەيروحيرۋرگيالىق قىزمەتى بۇگىنگى تاڭدا ەڭ وزىق جانە قارقىندى دامىپ كەلە جاتقان سالالاردىڭ ءبىرى بولىپ تابىلادى. جوعارى تەحنولوگيالىق، جاڭا ادىستەر مەن زاماناۋي جابدىقتاردى قولدانۋ كۇردەلى نەيروحيرۋرگيالىق اۋرۋلاردى انىقتاۋ مەن ەمدەۋدە جوعارى ناتيجەلەرگە قول جەتكىزۋگە مۇمكىندىك بەرەدى.