الماتى قالاسىنىڭ اۋماقتىق سايلاۋ كوميسسياسى حالىقتى الداۋعا جول بەرمەۋ ءۇشىن تەك قانا شىنايى اقپاراتتى تاراتۋعا شاقىرادى
الماتى قالاسىنىڭ اۋماقتىق سايلاۋ كوميسسياسى HAQ قوعامدىق قايىرىمدىلىق قورىنىڭ ينتەرنەت جەلىسىندە تاراتقان №4 ءبىرمانداتتىق اۋماقتىق سايلاۋ وكرۋگى بويىنشا سايلاناتىن قازاقستان رەسپۋبليكاسى پارلامەنتى ءماجىلىسى دەپۋتاتتارىن سايلاۋ بويىنشا №99 سايلاۋ ۋچاسكەسىندەگى داۋىس بەرۋ ناتيجەلەرى تۋرالى ۋچاسكەلىك سايلاۋ كوميسسياسىنىڭ حاتتاماسى دەلىنگەن فوتوداعى قۇجاتتىڭ شىندىققا سايكەس كەلمەيتىنىن حابارلايدى.
بىرىنشىدەن، جاريالانعان فوتولارداعى حاتتامانىڭ قازاقستان رەسپۋبليكاسى ورتالىق سايلاۋ كوميسسياسىنىڭ 2023 جىلعى 20 قاڭتارداعى №18/672 قاۋلىسىنىڭ (الماتى قالاسى ءماسليحاتىنىڭ دەپۋتاتتارىن پارتيالىق تىزىمدەر بويىنشا سايلاۋ بويىنشا داۋىس بەرۋ ناتيجەلەرى تۋرالى) №32 قوسىمشاسى بويىنشا تولتىرىلعان، قۇجاتتا ساياسي پارتيالاردىڭ اتاۋىنىڭ ورنىنا №4 ءبىرمانداتتىق اۋماقتىق سايلاۋ وكرۋگى بويىنشا سايلاناتىن قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا كانديداتتاردىڭ ءاتى-جونى كورسەتىلگەن.
ەكىنشىدەن، ءتۇپنۇسقا حاتتاما قازاقستان رەسپۋبليكاسى ورتالىق سايلاۋ كوميسسياسىنىڭ 2023 جىلعى 20 قاڭتارداعى №18/672 قاۋلىسىنىڭ 20-قوسىمشاسىنىڭ نىسانى بويىنشا رەسىمدەلگەن. تاراتىلعان فوتولاردا تىركەلگەن 28 ۇمىتكەردىڭ ورنىنا تەك 6 ۇمىتكەردىڭ ءاتى-جونى عانا كورسەتىلگەنىنە نازارلارىڭىزدى اۋدارامىز.
ۇشىنشىدەن، №99 سايلاۋ ۋچاسكەسىنىڭ ۋچاسكەلىك سايلاۋ كوميسسياسىنىڭ سەنىم بىلدىرىلگەن ادامداردى، ساياسي پارتيالاردىڭ، وزگە دە قوعامدىق بىرلەستىكتەردىڭ، كوممەرسيالىق ەمەس ۇيىمداردىڭ بايقاۋشىلارىن، قازاقستان رەسپۋبليكاسىنىڭ ب ا ق وكىلدەرىن، شەت مەملەكەتتەردىڭ سونداي-اق حالىقارالىق ۇيىمداردىڭ بايقاۋشىلارىن سونداي-اق شەتەلدىك ب ا ق وكىلدەرىن ەسەپكە الۋ جانە تىركەۋ جۋرنالىنىڭ دەرەكتەرىنە سايكەس، سايلاۋ ۋچاسكەسىندە داۋىس بەرۋ كۇنى ىشىندە جانە داۋىستاردى ساناۋ كەزىندە تىركەۋدەن وتكەن 5 بايقاۋشى/سەنىم بىلدىرىلگەن تۇلعا عانا بولعان. "قازاقستان رەسپۋبليكاسىنداعى سايلاۋ تۋرالى" قازاقستان رەسپۋبليكاسى كونستيتۋسيالىق زاڭىنىڭ 43-بابىنىڭ 8-تارماعىنا سايكەس، اتالعان كونستيتۋسيالىق زاڭ تالاپتارىنا سايكەس، قاتىسۋشى ادامنىڭ قالاۋى بويىنشا داۋىستاردى ساناۋ كەزىندە وعان كوميسسيا ءتوراعاسى جانە حاتشىنىڭ قولدارى قويىلعان سونىمەن قاتار، سايلاۋ كوميسسياسىنىڭ مورىمەن كۋالاندىرىلعان حاتتامانىڭ كوشىرمەسى بەرىلەدى. وسى بەلگىلەنگەن تارتىپپەن كۋالاندىرىلعان حاتتامالاردىڭ كوشىرمەلەرىن سەنىم بىلدىرىلگەن ادامدار مەن بايقاۋشىلاردىڭ ەشقايسىسى الماعان، ەسەپكە الۋ جانە تىركەۋ جۋرنالىندا كوشىرمەلەردى الۋ فاكتىسىن راستايتىن بايقاۋشىلار مەن سەنىم بىلدىرىلگەن ادامداردىڭ قولدارى دا جوق.
تورتىنشىدەن، ءتۇپنۇسقا حاتتاماعا ەكى ءمور قويىلۋى كەرەك: ءتۇپنۇسقا حاتتاما كوشىرمەسىنىڭ ءوز ءمورى، سونداي-اق ۋچاسكەلىك سايلاۋ كوميسسياسىنىڭ ءتوراعاسى مەن حاتشىسىنىڭ قولىمەن راستالعان "ءتىرى" دەپ اتالاتىن ءمور.
بەسىنشىدەن، فوتوسۋرەتتەگى كوميسسيا مۇشەلەرىنىڭ قولدارى ولاردىكى ەمەس ەكەنى كورىنىپ تۇر، ونى ۋچاسكەلىك سايلاۋ كوميسسياسىنىڭ مۇشەلەرى دە راستادى. قۇجاتتاعى ءموردىڭ ءوزى وقىلمايدى، ونى № 99 سايلاۋ ۋچاسكەسىنىڭ تاڭباسى رەتىندە انىقتاۋ مۇمكىن ەمەس.
جوعارىدا ايتىلعانداردى ەسكەرە وتىرىپ، حاتتامانىڭ فوتوسۋرەتتەرى دەلىنگەن قۇجات №99 ۋچاسكەلىك سايلاۋ كوميسسياسىنىڭ رەسمي قۇجاتىنىڭ كوشىرمەسى ەمەس. وسى فوتوسۋرەتتەردى دايىنداۋ جانە ولاردى ودان ارى تاراتۋ ارەكەتتەرىن زاڭناماعا سايكەس، زاڭدى تۇردە وتكىزىلگەن سايلاۋ ناتيجەلەرىن بۇرمالاۋ جانە بەدەلىن ءتۇسىرۋ ارەكەتى دەپ ساناۋعا بولادى.
وسىعان بايلانىستى الماتى قالاسىنىڭ اۋماقتىق سايلاۋ كوميسسياسى حالىقتى الداۋعا جول بەرمەۋ ءۇشىن تەك قانا شىنايى اقپاراتتى تاراتۋعا شاقىرادى.
الماتى قالاسىنىڭ اۋماقتىق سايلاۋ كوميسسياسى جالعان اقپارات تاراتاتىن تۇلعالاردى جاۋاپقا تارتۋ ءۇشىن قاداعالاۋ جانە قۇقىق قورعاۋ ورگاندارىنا جۇگىنۋ قۇقىعىن وزىنە قالدىرادى.